Siglir tar il cuntegn

Regenza Portas serradas per «ils selvadis»

Linard Bardill è dapi il mardi in da set candidats per la regenza grischuna. El è in selvadi – in candidat selvadi, in che n'è betg commember dad ina partida. Candidats independents ch'han cumbattì per in sez en la regenza grischuna haja dà adina puspè.

Legende: Video Adina puspè selvadis en il cumbat per la regenza abspielen. Laufzeit 2:05 Minuten.
Or da Telesguard dals 08.05.2018.

Sper las candidaturas or da las retschas da las partidas datti adina puspè candidatas u candidats che na fan betg la via politica convenziunala – e quai sin tut il nivels da la politica.

L'ultim ch'ha candidà per in post en la regenza senza avair il sustegn dad ina partida era Christian Brosi – quella giada directur da la Scola media evangelica da Schiers. El aveva candidà il 2010. Sco Bardill uss aveva er Brosi en mira da surpigliar il departament d'educaziun. Durant ses cumbat electoral aveva el adina puspè crititgà la politica da la scola.

Adina puspè en il cumbat – adina puspè senza victoria

Cuntrari a la candidatura da Linard Bardill aveva Christian Brosi dentant annunzià sia candidatura 9 mais avant las elecziuns. La finala n'hai lura tuttina betg tanschì per Brosi, el ha fatg radund 7'700 vuschs. Gudagnà il cumbat ha il schef actual dal departament d'educaziun Martin Jäger cun radund 16'000 vuschs.

Il 2002 ha Luis Livers dal «Forum per il suveran» fatg passa 8'000 vuschs durant l'emprim scrutini. Anc quatter onns pli adura, il 1998, han candidà Adrian Steiger – oz president communal da Flem – ed il magister Stefan Tschümperlin. Steiger aveva fatg radund 7'000 vuschs e Tschümperlin gnanca 2'000.

TSG 17:40