Siglir tar il cuntegn
cuntegn

Regenza Podium d'elecziuns a Riom: Ideas novas, ma paucas surpraisas

Quai che pertutga il cartel eran ils candidats unanimamain da l'avis, ch'i dovra scleriment en chaussa. Pli animada era la discussiun, cura ch'i gieva per l'avegnir da la giuventegna, economia, turissem e cultura.

Il cumbat electoral per la regenza grischuna è lantschà e quai pir da dretg suenter che l'istorgia enturn il cartel en la branscha da construcziun è vegnida a la glisch. Ed il cartel è er stà il prim tema da la discussiun da podium a Riom. Ma co pudess ins evitar tals scandals? Las ideas persunalas tge far per che tals scandals na succedan betg pli sa differenzieschan dentant in pau.

Pervi dal cartel ha la runda da discussiun a Riom gia gì in participant pli pauc che oriundamain previs. Il mainafatschenta da la Societad grischuna d'impressaris constructurs, Andreas Felix, ha retratg sia candidatura per la regenza.

Dasper il cartel èn ils sis candidats restants Marcus Caduff (PCD), Mario Cavigelli (PCD), Jon Domenic Parolini (PBD), Peter Peyer (PS), Christian Rathgeb (PLD) e Walter Schlegel (PPS) tranter auter er anc sa fatschentads cun las suandantas dumondas: Co guarda il futur dals giuvens ora en il Grischun? Tge capita cun las regiuns perifericas e tge innovaziuns dovra il chantun?

Plazzas da lavur per promover e tegnair la giuventetgna

Il pli impurtant per promover e tegnair la giuventetgna en il chantun sajan plazzas da lavur attractivas. Qua eran tuts sis candidats svelt dal medem avis. Las propostas ed ideas co vegnir tar questas plazzas van però in zic in ord l'auter:

  • Il chantun duai ristgar dapli cun sustegnair finanzialmain projects pitschens ed inovativs (Walter Schlegel, PPS).
  • Essenzial saja l'access a l'internet svelt per pudair sa scolar e suenter er lavurar ora en las regiuns sco en ils centers (Peter Peyer, PS).
  • Sper l'internet svelt dovria er ina buna purschida dal traffic public, dal provediment da sanadad e pussaivladads da scolaziun en la regiun (Jon Domenic Parolini, PBD).
  • Centers regiunals sajan la basa per stgaffir bunas cundiziuns per plazzas attractivas, bunas cundiziuns da scolaziun sco er per il bainstar general (Mario Cavigelli, PCD).
  • Sa focussar sin spartas specificas e purschidas da nischa tant en l'economia sco en il turissem. Uschia saja pussaivel da tegnair ils pretschs ed en consequenza da quai er da porscher plazzas da lavur attractivas.
  • Resguardar er ils giuvens possessurs da segundas abitaziuns per ch'er la nova generaziun che surpiglia ussa questas abitaziuns vegnia vinavant en il Grischun, investeschia, haja plaschair e dettia vinavant quai er a lur uffants (Christian Rathgeb, PLD).

RR actualitad 07:00+