Siglir tar il cuntegn

Regenza Nagina disfidanza aifer la regenza

Ils candidats per la regenza e la regenza sco tala è vegnida fitg sut squitsch las ultimas emnas. Quai en connex cun il scandal enturn ils cartels en l'Engiadina. Tuttina saja l'atmosfera en la regenza buna, din ses commembers.

La regenza avant las medias.
Legenda: La regenza avant las medias. RTR

La lavur en la regenza Grischuna è stada pli intensiva ch'uschiglio las davosas emnas. La regenza ha stuì sa fatschentar cun las renfatschas ch'èn vegnidas da tuttas varts en connex cun il scandal da cartels en l'Engiadina. L'atmosfera saja dentant tuttina buna, manegia Mario Cavigelli, president da la regenza. I dettia dentant bler squitsch da tuttas varts.

Er Christian Rathgeb, che maina il departament da polizia, ed è uschia responsabel politicamain per l'arrestaziun dal whistleblower Adam Quadroni è sut squitsch. Quai smatgia sa chapescha sin l'atmosfera che saja pesanta. Uss saja dentant l'incumbensa da dumagnar la situaziun.

Quai vesa er Jon Domenic Parolini uschia. Ad el vegnia renfatschà ch'el saveva dals cartels n'haja dentant fatg nagut, quai anc en sia funcziun sco president communal da Scuol. Tuttina saja la collavuraziun en la regenza buna e disfidanza na dettia betg. Ina sceptica vicendaivla fiss en il fauss lieu, di el.

Il pli fitg sin il punct vegn dentant Martin Jäger – el na vul betg pli vegnir elegì e va la fin da l'onn en pensiun. Vers el na datti er naginas renfatschas en connex cun il cartel. Tenor el saja actualmain in grev temp ed i haja dà differentas sesidas extraordinarias. Tuttina haja la regenza empruvà da tegnair ensemen ils fils e quai saja gartegià pli u main. In clima da disfidanza na dettia dentant betg, metta er el cler.

Telesguard dals 09.05.2018 – il Grischun en la crisa?

La reputaziun dal Grischun ha patì il davos temp. La culpa è il scandal da cartels en la branscha da construcziun. Betg be ils impressaris èn vegnids crititgads, ma er la regenza grischuna è vegnida en il focus da la critica. E quai sur ils cunfins dal chantun ora. Ina situaziun pauc empernaivla en vista a las elecziuns che stattan avant isch.

Legende: Video La regenza grischuna ha in problem d’image abspielen. Laufzeit 2:21 Minuten.
Or da Telesguard dals 09.05.2018.

RR novitads 07:00