Siglir tar il cuntegn
Inhalt

Marcus Caduff (PCD) Politica: «Betg centralisar tut»

El veglia esser in politicher che cumbattia la centralisaziun, di Marcus Caduff che candidescha da nov per la regenza grischuna. En il Cussegl grond politisescha el dapi il 2006.

Marcus Caduff vul far ils 10 da zercladur 2018 il segl en la regenza grischuna.
Legenda: Marcus Caduff vul far ils 10 da zercladur 2018 il segl en la regenza grischuna. RTR

Dapi che Marcus Caduff è politicher s'engascha el per las regiuns. Daco ch'ils uffizis stoppian adina vegnir centralisads a Cuira è ina dumonda ch'el fa savens. Tscherts uffizis pudessan ins era laschar en las regiuns, accentuescha il politicher da la PCD. Per il bab da famiglia èsi impurtant che las vischnancas restian uschè autonomas sco pussaivel.

Per quai vul Marcus Caduff s'engaschar

  • fermas regiuns
  • encunter la centralisaziun
  • turissem
  • ina ferma economia
Ensemen cun ses collega da partida, Mario Cavigelli, vul Marcus Caduff vegnir elegì en la regenza grischuna.
Legenda: Ensemen cun ses collega da partida, Mario Cavigelli, vul Marcus Caduff vegnir elegì en la regenza grischuna. RTR, Nora Baltermia

Tge midass cun Caduff en la regenza?

El na vegnia betg ad inventar la roda da nov e metter tut sin il chau. Chaussas sco l'infrastructura da vias fin il sectur da sanadad funcziunan bain en noss chantun, di l'um da 44 onns.

Ina finamira dal Lumnezian fiss dentant da promover il Grischun sco lieu economic e lieu d'abitar. Perquai saja era la scolaziun en noss chantun insatge impurtant. Per exempel da scolar ils uffants per il futur. En la digitalisaziun stoppian las scolas vegnir pli fittas, manegia Marcus Caduff: «Noss uffants ston esser pinads per las clamadas dal futur».

En 20 onns vegnia relativ bler ad avair da far cun l'informatica e la digitalisaziun. Ina buna scolaziun e furmaziun creeschia perspectivas, promovia l’economia e las instituziuns socialas, è el persvadì.

RR actualitad 07:00