Siglir tar il cuntegn
Inhalt

Marcus Caduff (PCD) Persunal: «Fascinà da l'aviatica»

Il Lumnezian è ina persuna da la natira, ina persuna che passenta gugent temp dadora – saja quai sin pista u sin il mountainbike. Ina gronda fascinaziun da Marcus Caduff è era l'aviatica.

Marcus Caduff è creschì si a Morissen ed abita anc oz en la Val Lumnezia. Professiunal è Marcus Caduff gia stà activ en differents secturs: Il bab da duas buobas ha studegià agronomia a l'ETH da Turitg. Suenter in segund studi en scienza da manaschi ha el lavurà ditg tar la plazza d'aviatica a Turitg. Dapi l'entschatta 2017 è el il CEO dal Spital regiunal a Glion.

Marcus Caduff

Lieu: Morissen
Annada: 1973
Professiun: CEO dal spital regiunal a Glion
Hobis: Ir cun skis, passlung, viandar, ir cun mountainbike, l'aviatica
Famiglia: Maridà e bab da duas buobas

Fanaticher da l'aviatica

Sche Marcus Caduff discurra sur da l'aviatica è el en ses element. L’aviatica fascinescha il Lumnezian. Gia en giuvens onns ha el fatg la scolaziun da pilot – el è en possess dal permiss da sgular sin basa privata.

Na betg tuts chapeschan mia gronda fascinaziun per l'aviatica.
Autur: Marcus Caduff

El na saja dapi blers onns betg pli sgulà, ma la fascinaziun saja anc adina qua. Il politicher cristiandemocrat è en il possess d’ina app, nua ch'el po persequitar il traffic en l'aria. Quest app saja anc stediamain en funcziun. «Mia dunna scrola mo il chau, cura ch'jau less savair tge aviun che sgola sur mai», uschia Caduff.

RR actualitad 07:00