Siglir tar il cuntegn
Inhalt

Linard Bardill Politica: «La cultura dat identitad»

Quai che manca cunzunt en la periferia è l'identificaziun cun il lieu e l'identitad e na betg be las plazzas da lavur. Quai di Linard Bardill, il candidat independent per la regenza grischuna.

Linard Bardill en ses atelier a Scharans.
Legenda: Linard Bardill en ses atelier a Scharans. RTR, Prisca Bundi

Linard Bardill è chantautur ed artist. Tuttina è el adina puspè s'engaschà politicamain. Per exempel il cumenzament dals onns 1990, lura è el s'engaschà encunter l'EWR, il spazi europeic economic. Il 2014 ha el er candidà sco president communal da sia patria Scharans. Grategià n'èsi betg - Linard Bardill ha dentant fatg part da la cumissiun da la planisaziun locala e ha là fatg experientschas cun la politica communala.

L'onn passà è el lura s'engaschà fermamain per il directur dal museum d'art ch'era vegnì degradà. Tut acziuns politicas. Insumma, er sch'el na saja betg politicher, saja el in uman fitg politic, uschia Linard Bardill.

Per quai vul Linard Bardill s'engaschar

  • la scol'auta da pedagogia duai restar en il Grischun
  • la glieud duai pudair viver en la periferia
  • per quella glieud che n'ha betg ina simpla vita

«Mes venter di: Jau vegn elegì»

Linard Bardill è in uman che taidla sin ses venter, quel saja fitg bain infurmà. Er tar la dumonda sch'el duai candidar per la regenza ha el dumandà quel. E ses venter di che sia schanza da daventar cusseglier guvernativ è tar 80%.

Sch'el vegn elegì lura spera el che ses spiert avert vegn a midar bler en il Grischun. Per exempel ch'ins discurra dals uffants e betg da plans d'instrucziun. In dals gronds problems en il Grischun saja che la glieud na restia betg en las valladas e midia en il centers. Perquai èsi per Linard Bardill fitg impurtant ch'er fatschentas pitschnas e mesaunas possian vinavant surviver en la periferia. I dovria dentant betg mo plazzas da lavur per che la glieud resta en las regiuns, mabain cunzunt identificaziun - per exempel enten promover la cultura dal lieu. Cultura dettia identificaziun ed identitad ed uschia restia la glieud era en las regiuns.

RR actualitad 07:00