Siglir tar il cuntegn

Regenza Linard Bardill candidescha per la regenza

El giaja sco candidat senza partida en il cumbat electoral per la regenza grischuna. Quai ha Bardill annunzià sin sia pagina d'internet ed envers la gasetta Südostschweiz.

Legende: Video Il candidat selvadi – Linard Bardill vul ir en la regenza abspielen. Laufzeit 02:59 Minuten.
Or da Telesguard dals 08.05.2018.

La crisa politica e la crisa morala en connex cun il cartel en la branscha da construcziun hajan commuventà el scriva l'artist e teolog da 61 onns sin sia pagina d'internet. Perquai saja el sa decidì da candidar per las elecziuns da la regenza.

Sustegn dad in comité independent

El vegnia sustegnì d'in comité independent da persunas activas sin il camp cultural. Sin sia pagina d'internet recumondan diversas persunalitads Linard Bardill sco la dretga persuna per la regenza grischuna, cunzunt per il departament da cultura ed educaziun. Tar il comité independent tutgan per exempel l'architect renumà Valerio Olgati u il scriptur Gion Mathias Cavelty.

Ina forza independenta sco Linard Bardill, betg isada u malduvrada, po be far bain a la politica da noss chantun Grischun.
Autur: Göri Klaingutiscriptur e pur

Sia finamira saja da surpigliar il Departament d'educaziun, cultura e protecziun da l'ambient da Martin Jäger. El veglia cunzunt s'engaschar politicamain per uffants, dunnas, cultura e per persunas pli veglias.

El ha energia, cundiziun ed ina forza surprendenta da realisar chaussas... Sco persuna senz'experientscha politica faschess el inqual chaussa auter...
Autur: Valerio Olgiatiarchitect

Bun in mais avant las elecziuns

Linard Bardill s'annunzia bun in mais avant las elecziun grischunas ch'èn ils 10 da zercladur. En il Grischun na datti nagin termin per s'annunziar sco candidat. Er po mintgin che posseda il dretg da votar s'annunziar e vegnir elegì. I na dat nagin proceder d'annunzia sco per exempel tar las elecziuns per il Cussegl naziunal. Ch'in candidat «selvadi» vegn però elegì, capita fitg darar.

Jau hai udi ordavant ch'insatge creschia qua in zic. Perquai na sun jau betg stà uschè surprais.
Autur: Peter Peyercandidat socialdemocrat per la regenza

Concurrent Peter Peyer beneventa la candidatura

Sco il candidat socialdemocrat ha ditg envers RTR, saja quai en general da beneventar sche uschè blers sco pussaivel sa participeschian al cumbat electoral. Perquai che cumbat electoral saja concurrenza e concurrenza dettia sch'i haja massa candidats. Ed er haja la populaziun uschia ina pli gronda elecziun.

RR novitads 06:00