Siglir tar il cuntegn
Inhalt

Elecziuns 2018 PBD va ussa tuttina mo cun Parolini en il cumbat

La direcziun da la partida burgais-democratica ha anc ina giada examinà sia decisiun dal venderdi, da be ir cun in candidat en il cumbat per la regenza: Jon Domenic Parolini resta il sulet candidat. Gian Michael, il manader dal cumbat conceda che lur communicaziun na saja betg stada exemplarica.

Legende: Video Parolini resta il sulet candidat per la regenza abspielen. Laufzeit 03:55 Minuten.
Or da Telesguard dals 30.04.2018.

La partida saja vegnida a la conclusiun, ch'i n'è betg pussaivel da bajegiar si a curta vista ina seriusa candidatura per remplazzar Andreas Felix, communitgescha la partida. Ins vegnia uschia però anc a s'engaschar pli fitg per l'elecziun da Jon Domenic Parolini – il minister d'economia en uffizi.

L'emprim na, suenter tuttina gea ... ed uss: definitivamain na

Suenter la decisiun da Felix da betg candidar, aveva la PBD l'emprim anc annunzià ch'ins sa focusseschia be sin l'elecziun da Parolini. La dumengia suenter la radunanza da delegads ha la partida però ditg envers la «NZZ am Sonntag», ch'ins pondereschia da tuttina nominar in segund candidat.

Nagina communicaziun exemplarica

Il manader dal cumbat electoral da la PBD Gian Michael ha concedì autocritic ch'els hajan fatg in vair «slalom» ils davos dis. Era per els saja la situaziun stada extraordinaria cun la demissiun d'Andreas Felix. E forsa hajan els n'er betg communitgà fitg precaut.

Nums d'in candidat u candidata n'èn anc betg stads tema

Sco Gian Michael di vinavant sajan nums da candidats pussaivels na betg anc stads tema. Tar la sesida da direcziun saja propi be ì per la dumonda: segunda candidatura gea u na. Ch'els sajan sa decidì cunter ina segunda candidatura haja da far cun il temp enfin las elecziuns.

Tschintg emnas avant na tanschia quai simplamain betg. Uss spera Michael ch'i dettia temps pli ruassaivels per la partida burgais-democratica ch'è stada omnipreschenta en las medias. La finala saja el pur e sin ses bain puril dettia quai bler da far, di el cun in surrir.

RR novitads 15:00