Siglir tar il cuntegn

Elecziuns 2018 PBD: «Ussa pir da dretg»

Igl è in terratrembel politic per la PBD: 6 emnas avant las elecziuns perda ella cun Andreas Felix in da ses dus candidats per la regenza. A la radunanza da delegads a Seewis èn politicras e politichers persvadids che la PBD possia puspè fitgar pe.

Delegadas e delegads han respectà la decisiun dad Andreas Felix da demissiunar ed uschia proteger la partida. Che l'entir scandal giaja sper la PBD ora senza far donns na crajan betg tuts. Uschia era cussegliera guvernativa Barbara Janom Steiner. Ella ha accentuà en ses pled ch'il mund da la PBD na saja betg pli dal tut en urden. Il scandal saja incredibel ed exponents dalla PBD sajan vegnids mess en connex cun quel. Tuttina è ella da buna speranza.

Jau sun persvada che votants percorschan ch’il scandal ha da far nagut cun la politica da la partida.
Autur: Barbara Janom SteinerCussegliera guvernativa

Plinavant deplorescha Janom Steiner ch'ella na po betg surdar ses sez ad in dals collegas da partida. Quai saja donn, la decisiun dad Andreas Felix dentant dad acceptar e respectar. La cussegliera guvernativa spera er che las turbulenzas n'hajan nagin effect sin las elecziuns en il Cussegl grond.

Nagin squitsch dalla partida

La PBD n'haja betg fatg squitsch sin Andreas Felix da demissiunar suenter l'affera da cartels en la branscha da construcziun en l'Engiadina. Quai ha confermà Gian Michael, manader dal cumbat electoral . Anzi, el haja anc empruvà da persvader Andreas Felix da restar candidat.

Focus sin Jon Domenic Parolini

Chattar in'autra candidata u in auter candidat per la regenza en uschè curt temp, saja pauc realistic. La partida veglia ussa sa concentrar sin la reelecziun da cusseglier guvernativ Jon Domenic Parolini. Per Parolini sez na midia betg bler en il cumbat, ha ditg il burgais-democrat. Gia avant eri ses focus sin sia reelecziun. El deplorescha dentant che ses collega da partida Andreas Felix n'è betg pli da sia vart.

Jau crai che quai è insatge che nus da la PBD vain en ils gens. Nus essan disads da stuair cumbatter cun chaussas malgistas. Quai avain nus intus.
Autur: Martin LandoltPresident PBD Svizra

Quai è era ord vista administrativa ina sfida: Dapertut en il Grischun pendan gia placats cun omadus politichers. Ina part da la campagna electorala possian els anc adattar - sin tscherts flyer per exempel restia dentant la fotografia dad Andreas Felix, uschia Gian Michael.

Remplazzar la mesadad da deputadas e deputads

Sut squitsch è la partida era tar l'elecziun dal Cussegl grond. Actualmain è la PBD la terz gronda partida cun 27 deputadas e deputads. Tenor retschertgas dad RTR demissiuneschan dentant 14 persunas - quai è 52% da la fracziun.

Las elecziuns da regenza e parlament èn ils 10 da zercladur.

RR actualitad 12.00