Siglir tar il cuntegn
cuntegn

Elecziuns 2018 PBD: Da gnervus fin respect en vista a las sfidas dal 2018

L'onn 2018 n'è betg mo l'onn dal 10avel giubileum per ils burgais-democrats, els ston era defender lur posiziun tar elecziuns en ils chantuns da tschep Grischun, Berna e Glaruna.

Gian Michael, manader dal cumbat electoral ensemen cun ils candidats Jon Domenic Parolini ed Andreas Felix fan viva.
Legenda: Per il cumenzament da l'onn hai dà in viva: Gian Michael, manader dal cumbat electoral ensemen cun ils candidats Jon Domenic Parolini ed Andreas Felix. RTR, Gion Gieri Flepp

Il pli impurtant en curt:

  • L'onn dal 10avel giubileum stat la PBD tant sin nivel naziunal sco er chantunal avant grondas sfidas.
  • I dat elecziuns en ils chantuns da tschep Berna, Glaruna e Grischun. Elecziuns ch'èn impurtantas per l'avegnir da la partida naziunala. I vala da defender uschè blers sezs sco pussaivel.
  • Ils dus candidats per la regenza grischuna Jon Domenic Parolini ed Andreas Felix na ston betg mo sa defender cunter ils candidats da la PPS (Walter Schlegel) e da la PCD (Marcus Caduff), els ston era persvader la glieud malgrà ch'els han omadus procurà per lingias grassas negativas l'onn passà.

Cun las elecziuns en ils chantuns da tschep da la PBD Berna, Glaruna e Grischun vai il 2018 er per l'avegnir da la partida naziunala. Uschia chatta il cusseglier naziunal burgaisdemocrat Duri Campell lura er clers pleds en vista a l'avegnir:

Quai è segir la sfida la pli gronda dal 2018 che nus pudain mussar si en quels trais chantuns, ils pli impurtants per la PBD, che nus essan anc adina ferms e che nus essan vegnids per restar
Autur: Duri Campellcusseglier naziunal, PBD

Omadus candidats grischuns en las lingias grassas negativas

Sper l'aspect ch'i va il 2018 per la posiziun en ils chantuns da tschep ed uschia er la forza da la PBD sin nivel naziunal, èn er las sfidas en il chantun da tschep Grischun grondas.

Jon Domenic Parolini, il minister d'economia, che vul defender ses sez en la regenza è vegnì crititgà perquai ch'el ha dà daners dal chantun al Hotel Flaz a Puntraschigna. El sez na vesa quai però betg exnum sco dischavantatg. Sch'ins saja en la regenza e veglia muventar insatge, stoppian ins trair decisiuns. Quai haja el fatg ils ultims trais onns. Betg adina las pli popularas, ma adina en la persvasiun ch'i saja bun per il chantun e per l'economia grischuna.

Er il segund candidat da la PBD, il president da la partida, Andreas Felix è stà en las lingias grassas negativas. Quai en sia funcziun sco mainagestiun dals impressaris grischuns e las inquisiziuns da la Cumissiun da concurrenza (WEKO) en connex cun cunvegnas da pretschs. El sez n'ha betg propi vulì prender posiziun en chaussa. Tenor il cusseglier naziunal Duri Campell saja la sfida per la partida uss da mussar si che Andreas Felix sco mainafatschenta na saja betg pertutgà da l'entira istorgia.

Anc duas autras partidas vulan in sez

Defender il bun num da lur candidats è l'ina. L'autra è da cumbatter cunter la concurrenza da la PCD e la PPS. La Partida cristiandemocratica va cun il segund candidat Marcus Caduff, il directur dal Spital regiunal Surselva, en il cumbat. La Partida populara cun il cumandant da la Polizia chantunala, Walter Schlegel. Barbara Janom Steiner sa co far frunt a quella concurrenza:

Far ina politica per l'entir Grischun, per la populaziun, ina politica liberala, sociala però er ina politica che mantegna las valurs...
Autur: Barbara Janom Steinerministra da finanzas, PBD

Gnervus saja il fallà pled en vista a quai che spetga il 2018, uschia il president da la partida Andreas Felix. Els hajan però respect da las sfidas. E tut ils exponents burgaisdemocrats èn da l'avis ch'i saja uss da persvader la glieud cun buna lavur.

RR actualitad 07:00