Siglir tar il cuntegn
Inhalt

Elecziuns 2018 Parolini sto cumbatter

Tut ils trais cussegliers guvernativs actuals vegnissan reelegids. Quai mussa ina retschertga che l'institut sotomo ha fatg per incumbensa dad RTR e Somedia.

Christian Rathgeb e Mario Cavigelli han actualmain in avantatg sin Jon Domenic Parolini.
Legenda: Christian Rathgeb e Mario Cavigelli han actualmain in avantatg sin Jon Domenic Parolini. RTR

Las pli bleras vuschs survegniss Christian Rathgeb (PLD) cun 61.8%. Ad el sin ils chaltgogns è Mario Cavigelli (PCD) cun 58.1%. Jon Domenic Parolini percunter survegniss marcantamain pli paucas vuschs, numnadamain 42%.

L'affera da cartel ha in'influenza

Ina procentuala sut 50% hajan normalmain plitost candidats novs, declera il politolog da sotomo Michael Hermann. Che Jon Domenic Parolini survegnia actualmain bler pli paucas vuschs ch'ils dus auters cussegliers guvernativs en uffizi, haja segir da far cun l'affera da cartel en la branscha da construcziun en l'Engiadina.

Christian Rathgeb (92%) e Mario Cavigelli (94%) han dapli sustegn dad electurs ord lur atgna partida.
Legenda: Christian Rathgeb e Mario Cavigelli han grond sustegn dad electurs ord lur atgna partida. RTR

La retschertga mussa dentant era danunder che las vuschs vegnan: Dad electurs burgaisdemocratics survegn Jon Domenic Parolini 83% da las vuschs. Il politolog Michael Hermann fa quai surstar: Quai saja pli bass che tar ses dus collegas d'uffizi e quests resultats mussian plitost in maletg d'in candidat nov e betg d'in cusseglier guvernativ ch'è gia quatter onns en uffizi.

Christian Rathgeb giauda il sustegn da 92% ord la Partida liberaldemocratica e Mario Cavigelli elegessan perfin 94% da la Partida cristiandemocratica. Ad omadus gartegia quai dentant era da recaltgar bleras vuschs ord autras partidas – a Jon Domenic Parolini plitost betg.

La retschertga da sotomo

Personen-Box aufklappenPersonen-Box zuklappen

La retschertga è vegnida fatga tranter ils 4 ed ils 14 da matg 2018 e quai via las paginas d'internet dad RTR e Somedia e cun agid d'in pool dad e-mail da sotomo. En tut èn vegnidas dumandadas 1'495 persunas. La quota da malsegirtad munta a +/-3.16%.

Elecziuns grischunas 2018

Legende: Video Jon Domenic Parolini sto cumbatter per las vuschs abspielen. Laufzeit 02:31 Minuten.
Or da Telesguard dals 17.05.2018.

RR actualitad 17.00