Siglir tar il cuntegn
Inhalt

Elecziuns 2018 Naginas dunnas: «Deplorabel, putgà e betg optimal»

En la regenza grischuna n'hai a partir dal 2019 naginas dunnas pli. A disposiziun per ils tschintg sezs stattan set persunas – dentant mo umens. Il tenor è dapertut il medem. Igl è da deplorar, però er chapibel.

Nagina dunna suonda a Barbara Janom Steiner.
Legenda: Nagina dunna suonda a Barbara Janom Steiner. RTR, Michel Decurtins

Per tut las deputadas e tut ils cussegliers guvernativs dumandads è la chaussa clera. I duvrass ina buna maschaida e tar quella tutgan er dunnas. Dentant cler, i na saja betg uschè simpel da chattar las dunnas ch'èn prontas da surpigliar in tal post. Per bleras è la famiglia il motiv principal da betg candidar, autras èn da l'avis ch'ellas sajan memia veglias.

La vart feminina va a perder

Cun Barbara Janom Steiner, che sto bandunar la regenza pervi da la limitaziun da temp d'uffizi , va suenter blers onns la vista feminina en la regenza a perder. Ella ed er las deputadas dumandadas Martha Widmer-Spreiter, Cornelia Märchy, Magrit Darms u er Leta Steck èn da l'avis che dunnas han forsa in zic in'autra moda e maniera da politisar. Forsa cun in zic dapli sentiment e precauziun ch'ils umens.

RR actualitad 17:00