Siglir tar il cuntegn

Cussegl grond Il nov parlament è pli liberal

Tenor Smartvote è il nov Cussegl grond daventà pli liberal. La gronda part dals deputads beneventan la lètg tranter omosexuals, la legalisaziun da cannabis e la separaziun tranter baselgia e stadi.

Legende: Audio Saira: Tge sa mida cun il nov parlament? abspielen. Laufzeit 3:22 Minuten.
3:22 min, Actualitad dals 11.06.2018.

Smartvote – in sistem, nua ch'ils politichers pon respunder dumondas, uschia ch'ins po vesair nua ch'els stattan politicamain – ha fatg ina evaluaziun dal nov parlament e da la nova regenza.

Parlament nov-elegì pli liberal che quel actual

Cunzunt tar il parlament pon ins vesair ch'el è daventà pli liberal. 69% dal nov parlament èn per exempel persuenter che la lètg omosexuala survegn ils medems dretgs sco la lètg eterosexuala. U 61% èn perla legalisaziun da cannabis per l'agen diever. E 63% vulan separar baselgia e stadi consequentamain. Enpli è il nov parlament er encunter, ch'i duai vegnir pli grev da daventar burgais svizzer – ed el è da l'avis, ch'i na dovria betg dapli preschientscha da polizia.

Regenza sin la medema lingia

Tar bleras dumondas è la nova regenza dal medem avis sco il parlament. La pli gronda differenza datti tar la dumonda sche stadi e baselgia duain vegnir separads. 67% dal parlament èn persuenter, e mo in dals cussegliers guvernativs, Jon Domenic Parolini (PBD). Tschels quatter èn encunter.

Grafica cun ils dus smartspiders da parlament e regenza
Legenda: Il nov parlament e la regenza nova èn per gronda part sin la medema lingia. Smartvote

Savens è dentant il sulet betg-burgais l'exot – Peter Peyer (PS) è per exempel il sulet che na vul betg auzar la vegliadetgna da renta. Ubain er il sulet ch'è per ina paja minimala da 4'000 francs, u er per ina quota da dunnas da 35% en il cader da l'administraziun chantunala. Per part èn dentant er Marcus Caduff (PCD) e Christian Rathgeb (PLD) dal medem avis sco'l socialdemocrat.

Mintgatant è dentant er Marcus Caduff l'exot – el è per exempel il sulet che di gea a la dumonda sche organisaturs dad eveniments gronds duain surpigliar sez ils custs da segirtad, u er ch'il chantun duai sustegnair pli fitg pendicularas pitschnas u mesaunas.

RR actualitad 17:00