Siglir tar il cuntegn

Elecziuns 2018 Cumbat electoral grischun sin Google

Tschertg'ins sin Google la PBD grischuna, cumpara sisum dal tut la pagina il candidat da la PPS. Per la PBD na va quai betg. Quai na saja betg in cumbat electoral fair. La PPS di percunter che quai na saja betg succedì sapientivamain. Quai haja da far cun ils algoritmus da Google.

screenshot dals resultats da google tar la tschertga da «bdp graubünden»
Legenda: La pagina da la PPS avant quella da la PBD: La successiun dals resultats da Google che na plascha insumma betg a la PBD. RTR, Gion Gieri Flepp

Gian Michael, il manader dal cumbat electoral tar ils Burgaisdemocrats è ferm persvadì che la Partida populara haja cumprà il chavazzin PBD per sia reclama tar Google. Be uschia saja quai pussaivel che lur pagina cumparia sur quella da la PBD.

Na, di Valérie Favre Accola, la manadra dal cumbat electoral tar la PPS. Els n'hajan betg cumprà il chavazzin PBD. Quai possia ella er cumprovar. Els veglian cuntanscher la glieud che saja interessada a la PPS ed a las elecziuns da la regenza grischuna e betg ils interessents da la PBD.

screenshot dals chavazzins che la PPS ha cumprà tar Google AdWords
Legenda: Ils chavazzins che la PPS ha cumprà per far reclama sur google. mad / Valérie Favre Accola

Che la pagina da lur candidat cumpara anc adina sur la pagina da la PBD grischuna declera Valérie Favre Accola cun ils algoritmus da Google. Sch'ils chavazzins che la PPS ha cumprà vegnan duvrads savens sin la pagina da la PBD, lura fetschia quella da princip reclama per la pagina da la PPS.

... La PPS grischuna n'ha insumma betg contribuì insatge a quai.
Autur: Valérie Favre Accolamanadra dal cumbat electoral da la PPS

Google interpretescha quai lura uschia: Aha, ils chavazzins da la PPS vegnan numnads savens, pia è sia pagina interessanta e sto vegnir mussada sisum dal tut. Ina decleraziun ch'è tenor retschertgas dad RTR senz'auter plausibla. Declerar dal tuttafatg las cumbinaziuns che Google fa n'è dentant betg pussaivel.

Dumonda da caracter e da fairness

Gian Michael resta però tar sia posiziun. El haja gia fatg attent la PPS il favrer che lur pagina cumparia sisum sch'ins tschertgia la PBD. Tenor el vess la PPS pudì reagir e midar ils chavazzins, independent tgenins ch'els hajan cumprà.

... Quella chaussa n'è betg pli faira. E quai è er in pau ina dumonda da caracter quant lunsch che las partidas van qua.
Autur: Gian Michaelmanader dal cumbat electoral tar la PBD

Per la PBD è la chaussa liquidada cun quai. Auter la PPS, tenor Valérie Favre Accola è Google la culpa da la situaziun e las renfatschas envers la PPS betg acceptablas. Perquai pondereschian els tut tenor pass giuridics.

RR actualitad 17:00