Siglir tar il cuntegn
Inhalt

Elecziuns federalas 2015 Giuven e frestg – il podium d’elecziun a Cuira

Venderdi saira èn els vegnids a pled – en il podium d’elecziun a Cuira han giuvens e giuvnas grischunas tutgà sin il viv als candidats per il cussegl naziunal.

Ina runda dad elefants cun pizs e tempo, il studi da Demoscope ed in discurs cun il doyen da la Partida liberaldemocratica svizra PLD, Franz Steinegger – il podium d’elecziun da las duas chasas da medias Radiotelevisiun Svizra Rumantscha RTR e Somedia e dal Regionaljournal Graubünden dal Radio SRF ha purschì in punct culminant suenter tschel.

Ils stars da la saira èn dentant els stads: scolars e scolaras da sis scolas grischunas e lur dumondas ad ina candidata e tschintg candidats che vulan vegnir elegids en il cussegl naziunal.

18:30 - Bainvegni

Legende: Video Cumenzament dal podium d'elecziun abspielen. Laufzeit 01:46 Minuten.
Or da RTR dals 29.08.2015.

Il podium d’elecziun cun probablamain ils pli giuven public dals ultims onns cumenza precis las 18:30 en l’auditori da la GKB a Cuira.

«Gopfpertori, mier hättend doch Eini» – invista en la politica cun Franz Steinegger

Legende: Video Discurs cun Franz Steinegger abspielen. Laufzeit 07:20 Minuten.
Or da RTR dals 29.08.2015.

Franz Steinegger, il doyen da la Partida liberaldemocratica svizra PLD, tradescha en in discurs cun Silvana Giger sia metoda politica e lascha reviver uschia ina u tschella episoda da la politica dad ina giada.

6 scolas – 6 classas – 6 candidats - 6 minutas

Legende: Video Trailer dal podium d'elecziun a Cuira abspielen. Laufzeit 00:28 Minuten.
Or da RTR dals 28.08.2015.

Il recept è simpel – e la saira da venderdi ha mussà ch’el funcziuna.

La scola professiunala vs. Hans Peter Michel (PLD)

Legende: Video Scola professiunala Cuira abspielen. Laufzeit 08:36 Minuten.
Or da RTR dals 29.08.2015.

«Pertge essas vus sco nunconformist en la Partida liberaldemocratica PLD, essas vus in risico per vossa partida?» dumondan Michelle Willi ed Esther Sprecher da la scola professiunala Cuira il candidat Hans Peter Michel da Tavau.

Scuola Cantonale Grigioni – vs. Silva Semadeni (PS)

Legende: Video Scola chantunala grischuna abspielen. Laufzeit 07:29 Minuten.
Or da RTR dals 29.08.2015.

La cussegliera naziunala actuala da la Partida socialdemocratica PS Grischun, Silva Semadeni, ha da dar pled e fatg ad Elena Riedi e Luca Fanconi – tranter auter da las cellas solaras sin il tetg da sia chasa e schebain ella haja in surnum.

Center da furmaziun per la sanadad ed ils fatgs socials (cfss) vs. Heinz Brand (PPS)

Legende: Video Center da furmaziun per la sanadad ed ils fatgs socials abspielen. Laufzeit 07:07 Minuten.
Or da RTR dals 29.08.2015.

Il pli tard cura ch’Emanuela Pini e Jana Rupp dal Center da furmaziun per la sanadad ed ils fatgs socials (cfss) a Cuira han dumandà il cusseglier naziunal actual Heinz Brand da la Partida Populara Svizra dal PPS «Hend Sie Ihri Partei nit im Griff?», savevan ils politichers ch’ils scolars e las scolaras na sajan insumma betg da sutvalitar.

Academia Engiadina vs. Duri Campell (PBD)

Legende: Video Academia Engiadina abspielen. Laufzeit 07:06 Minuten.
Or da RTR dals 29.08.2015.

Co che Duri Campell da la Partida burgais-democratica (PBD) vuless porscher gnieus stabels per ils giuvens randulins engiadinais – ina da las dumondas centralas per Anna-Lisa Pfäffli e Fadri Rauch da la 5avla classa.

Schweizerische Alpine Mittelschule vs. Josias Gasser (PVL)

Legende: Video Schweizerische Alpine Mittelschule abspielen. Laufzeit 07:37 Minuten.
Or da RTR dals 29.08.2015.

Suenter avair vis gia trais rundas cun scolaras e scolars, ha Josias Gasser nizzegià gia l’emprima dumonda per far in spot da reclama per sasez. Dentant – mo uschè simpel n’han Lino Casty e Dillon Brunner da la 5. classa da la scola media a Tavau betg laschà mitschar el.

Center da formaziun Surselva vs. Martin Candinas (PCD)

Legende: Video Scola media mercantila da Glion abspielen. Laufzeit 07:42 Minuten.
Or da RTR dals 29.08.2015.

Martin Candinas, il cusseglier naziunal actual da la Partida cristiandemocratica svizra (PCD), è enconuschent per sia eloquenza. Malgrà quai han ils giarsuns Simon Steiner e Nadja Zinsli rablà or, ch’el ha stuì ponderar in mument avant che respunder.

Werner Reimann analisescha la retschertga trend grischun

Legende: Video Discurs cun Werner Reimann abspielen. Laufzeit 12:28 Minuten.
Or da RTR dals 29.08.2015.

En in discurs cun Silvio Liechti dal Regionaljournal Graubünden dal Radio SRF 1 analisescha Werner Reimann, co che las tendenzas da l'entira Svizra sa mussan en il Grischun. Per ils resultats ha procurà ina retschertga represchentativa che l'institut Demoscope ha fatg sin incumbensa da RTR, da la Südostschweiz ed dal schurnal regiunal da radio SRF.

Podi liber per la runda dad elefants

Legende: Video Runda d'elefants abspielen. Laufzeit 27:48 Minuten.
Or da RTR dals 29.08.2015.

«Vus n’avais nagina schanza, co faschais vus da nizzegiar ella?» era l’emprima dumonda dal duo da moderaturs Andri Franziscus (RTR) e Luzi Bürkli (Bündner Tagblatt) a Christian Stricker (PVL). Il vent frestg suflava encunter dentant a tut ils politichers sin il podium – e quai durant tut las bunamain 30 minutas che la discussiun ha durà. Ils dus moderaturs han tendì l’artg enfin a l’actualitad dal di, numnadamain quella, sch’il Grischun veglia danovamain candidar per gieus olimpics. Ils politichers han stuì respunder.

L’um dals 85% – invista en reelecziuns cun Franz Steinegger

Legende: Video Segund discurs cun Franz Steinegger abspielen. Laufzeit 06:52 Minuten.
Or da RTR dals 29.08.2015.

La finiziun da la saira: Anc ina giada respunda Franz Steinegger, il doyen da la Partida liberaldemocratica svizra PLD, las dumondas da Silvana Giger e pertge ch’el n’era betg enormamain gnervus cura ch’i sa tractava da sia reelecziun.