Dretga pli ferma, center pli flaivel

Sch'il pievel svizzer avess elegì gia ils 21 d'avust avess la PPS survegnì 28% da las vuschs, quai èn bunamain 2 % dapli ch'il barometer dal zercladur. Per la PLD avessan 16.9% da las votantas e votants vuschà. Il dretg politic vegn pli ferm, quai resulta da la retschertga da l'institut gfs.bern.

Laschar ir video «3. barometer d'elecziuns 9.09.2015»

3. barometer d'elecziuns 9.09.2015

2:05 min, Actualitad video dals 9.9.2015

PS resta il numer 2

La segund ferma partida resta la PS cun 19.3% (tuttina sco l'ultim barometer). Cumpareglià cun las elecziuns d'avant quatter onn è quai anc adina in gudogn. Il 2011 ha la PS survegnì 18.7% da las vuschs, gudagnass uschia vitiers vuschs.

grafica davart il svilup da las vuschs entaifer las singulas retschertgas

Legenda da maletgs: Svilup da las vuschs entaifer las retschertgas gia fatgas. rtr

PLD questa giada in zic damain

La partida liberaldemocratica ha questa giada fatg levamain pli paucas vuschs (-0.2%) ch'il segund barometer. Cun 16.9% è ella dentant anc adina cleramain sur ils 15.1% che la partida ha survegnì il 2011 e conferma la posiziun trais. Cuntrari als emprims dus barometers ha la PLD betg gudagnà vitiers vuschs da la PPS. Questa giada han omaduas partidas gudagnà vitiers a moda equivalenta.

PCD perda

La PCD na vegn betg da retegnair la tendenza negativa. Ils cristiandemocrats perdan vinavant ed han anc 11.1% (-0.5%) da las vuschs. Cumpareglià cun las ultimas elecziuns dal 2011 è quai passa 1% damain.

Cun 7.4% avessen ils Verds cuntanschì plazza tschintg, la PVL avess cuntanschì 4.3% e la PBD anc 4.2%. Il nov center che ha dà bler da discurrer il 2011 na splendurescha betg pli ferm. La separaziun da las partidas en atgnas fracziuns ha plitost flaivlentà il center enstagl da rinforzar el. L'institut gfs suppona che las votaziuns persas han consequenzas negativas per la PS, la PVL e la PCD.

Migraziun è vinavant il tema numer 1

grafica davart la dumonda tge partida schlia il meglier il problem da la migraziun

Legenda da maletgs: Per schliar il problem da la migraziun vesan ils pli blers la PPS sco la meglra partida. rtr

Era l'avust vegn numnà la migraziun sco il problem il pli urgent. Lura suondan la UE ed ils contracts bilaterals. Sin plazza trais datti trais problems che paran d'esser tuts tuttina urgents: la segirtad sociala, la dischoccupaziun e la dumonda da l'ambient. 29% da las persunas dumandadas elegissan la PPS, perquai ch'ellas èn dal maini che la partida populara pudess schliar il meglier la problematica da la migraziun. Per schliar ils problems en connex cun la segirtad sociala e dischoccupaziun elegessan las persunas la PS. E sco la partida che pudess schliar il meglier las dumondas en connex cun l'UE vesan ils dumandads la PLD.

En naginas da questas tschintg problematicas fissan dominantas las partidas PCD e PVL. La PBD vegn numnada sulet en la dumonda da l'UE.

La retschertga

Per il terz barometer d'elecziuns da la SRG SSR ha l'institut gfs.bern interrogà 2013 persunas cun dretg da votar en Svizra. Quai tranter ils 21 ed ils 29 d'avust 2015. Il sbagl da prova è tar +/- 2.2 %.