Siglir tar il cuntegn
Inhalt

Elecziuns dal Cussegl federal Guy Parmelin nov cusseglier federal

Il nov cusseglier federal ha num Guy Parmelin. L'Assamblea federala ha elegì el en il 3. scrutini. Candidatas e candidats "selvadis" aifer la PPS, ubain era dad autras partidas n'han gì nagina schanza. Walter Thurnherr daventa nov chancelier federal. El succeda a Corina Casanova.

Il Cussegl federal è cumplet.
Legenda: Il Cussegl federal è cumplet. Keystone

Il pur e viticultur vadais ha en mintga scrutini fatg las pli bleras vuschs, senza ch'ils auters candidats avessan gì schanzas pli grondas.. En il segund scrutini han mancà a Parmelin mo 3 vuschs per vegnir elegì.

Guy Parmelin è uschia il 116avel cusseglier federal e succeda ad Eveline Widmer Schlumpf che finescha cun la fin da l'onn. Guy Parmelin ha 56 onns e viva cun sia dunna sin in bain puril a Bursins/VD. El è en il Cussegl naziunal dapi ils 01.12.2003.

Anteriurs confermads cun in resultat meglier che l'auter

Ils anteriurs commembers dal Cussegl federal èn vegnids reelegids e confermads en lur uffizis. Il meglier resultat ha fatg Didier Burkhalter cun 217 vuschs, las pli paucas Ueli Maurer cun 173 vuschs.

D'attribuir saja questa cascada da buns resultats e confermas senza attatgas e gieus da nagina part politica cun il fatg, che la PPS n'haja betg cuntrafatg ed reelegì tras e tras ils cussegliers en uffizi. Quai ha interpretà il politolog Adrian Vatter en discurs cun la televisiun SRF.

Nagina surpraisa era tar presidi e vice-presidi 2016

Sco spetgà ed usità è il vice-president actual, cusseglier federal Johan Schneider-Ammann, vegnì elegì sco president da la Confederaziun da l'onn 2016. Quai cun 196 da 208 vuschs. Doris Leuthard daventa vice-presidenta.

Walter Thurnherr daventa chancelier federal

Sco successur da la chanceliera federala partenta Corina Casanova (PCD) ha l'Assamblea elegì Walther Thurnherr (PCD); quai cun 230 da 234 vuschs valablas. L'Argovian da 52 onns è actualmain secretari general dal departament federal per ambient, traffic, energia e communicaziun.

Il protocol dal ticher rumantsch da las elecziuns dal Cussegl federal dals 09.12.2015. Mintga decisiun.

Il ticker è a fin

  • 13:26

    Tgi che piglia tge departament vegn decis ils proxims dis

    Tge departament che Guy Parmelin vegn a surpigliar n'è betg cler. Quai decida il Cussegl federal sez. Là vala era il principi da l'anciennitad: Tgi ch'è il pli ditg en uffizi (Doris Leuthard) po decider sco emprim, schebain ella vul midar ubain betg.

    Sch'i navess betg da dar in consens, lura avess il Cussegl federal da vuschar davart la repartiziun.

    Previs èsi da far quai aifer ils proxims dis.

    sala da sesida dal cussegl federal
    Legenda: Tgi che surpiglia - ubain survegna - tge departament, decida il Cussegl federal aifer ils proxims dis. Keystone
  • 13:16

    Ussa èni tuts Cussegliers federals - ed 1 chancelier

    Suenter las elecziuns ha gì lieu la saramentaziun dal cusseglier federal nov-elegì, dals cussegliers federals re-elegids e dal chancelier federal.

    Enramà dals salters federals vegnan da sanester ils cussegliers federals Doris Leuthard, Ueli Maurer Didier Burkhalter, Simonetta Sommaruga, Johann N. Schneider-Ammann, Alain Berset, Guy Parmelin ed il chancelier federal Walter Thurnherr.

    cussegl federal e salters tar la saramentaziun
    Legenda: Keystone
  • 13:11

    Era l'elecziun dal president federal 2016 senza surpraisa

    L'Assamblea federala ha elegì il vice-president actual sco president dal Cussegl federal 2016: Johann N. Schneider-Ammann. Quai cun 196 vuschs tar in pli absolut da 105). Quai sco spetgà e sco usità: Il president è in uffizi per 1 onn ch'ils cussegliers federals fan en turnus e sper il manar il departament.

    Sco vice-presidenta 2016 è elegida Doris Leuthard. Quai cun 180 vuschs (tar in pli absolut da 102).

  • 12:25

    Walter Thurnherr succeda a Corina Casanova

    L'Assamblea federala ha elegì Walter Thurnherr (PCD) sco successur da Corina Casanova (PCD) - quai cun 230 da 234 vuschs valablas. L'Argovian da 52 onns ha uschia fatg bunamain il dubel dal pli absolut 118).

    Actualmain è Walter Thurnherr anc secretari general dal departament federal per ambient, traffic, energia e communicaziun - ed ha era declerà d'acceptar l'elecziun.

    walter thurnherr
    Legenda: L'actual secretari general dal departament per ambient, traffic, energia e communicaziun daventa nov chancelier federal. Keystone
  • 12:15

    Il resultat è pli cler che blers han spetgà

    Commentaders sco era experts èn surprais dal resultat uschè cler. 138 vuschs - vers las 88 da Thomas Aeschi e 11 da Norman Gobbi. Il candidat Thomas Aeschi, che valeva tant per las medias sco era per commentaders politics sco favurit, n'ha mai pudì periclitar la via da success da Guy Parmelin.

    3. scrutini per l'ultim mandat en il Cussegl federal

    CandidatA
    1. scrutini
    2. scrutini
    3. scrutini
    Guy Parmelin
    90117
    138
    Thomas Aeschi
    6178
    88
    Norman Gobbi
    5030
    11
    Thomas Hurter
    22-
    -
    Viola Amherd
    16-
    -
    ulteriurAs414
    -
  • 12:12

    Il Cussegl federal è cumplet

    Avant il maraton da medias che spetga ussa sin Guy Parmelin, gia l'emprima fotografia en il gremi.

    cussegl federal cumplet
    Legenda: L'emprima foto da Guy Parmelin cun ses collegas en il Cussegl federal. SRF
  • 11:56

    Guy Parmelin è elegì cun 138 vuschs

    Guy Parmelin engrazia per la cunfidanza. El haja bler respect dal mandat e da la populaziun. I saja era in signal cler ch'ina terza persuna da la Svizra franzosa vegnia elegì en il Cussegl federal.

    «Dapi la sessiun extra muros a Flem ha il Grischun ed il Rumantsch in plaz tut spezial en mes cor.»

    Formalmain accepta el l'elecziun.

    Legende: Audio Guy Parmelin engrazia e declerà d'acceptar l'elecziun abspielen. Laufzeit 03:13 Minuten.
    03:13 min, RTR Audio dals 09.12.2015.
  • 11:40

    Guy Parmelin bunamain elegì en 2. scrutini

    A Guy Parmelin (VD) han cun 117 vuschs mancà mo 3 per cuntanscher il pli absolut da 120 vuschs. Thomas Aeschi (ZG) ha era fatg dapli vuschs en il 2. scrutin. Per Norman Gobbi vegni però grev.

    En il segund scrutin crodan ussa tuts che han gì damain che 10 vuschs. A partir dal terz croda lura mintgamai l'ultim da la glista. Cunquai che mo anc ils candidats uffizials èn en cursa, n'èsi betg pli pussaivel da lantschar in "selvadi".

    2. scrutini per l'ultim mandat en il Cussegl federal

    CandidatA
    1. scrutini
    2. scrutini
    Guy Parmelin
    90117
    Thomas Aeschi
    6178
    Norman Gobbi
    5030
    Thomas Hurter
    22-
    Viola Amherd
    16-
    ulteriurAs414
  • 11:22

    Nagina decisiun: Parmelin (90) avant Aeschi (61) e Gobbi (50)

    En l'emprim scrutin han fatg las pli bleras vuschs ils candidats uffizials dal tichet da la PPS. Però era persunas che tschertas medias avevan lantschà sco potenzials candidats «selvadis».

    Nagin dals candidats ch'ha cuntanschì il pli absolut da 122 vuschs.

    1. scrutini per l'ultim mandat en il Cussegl federal

    CandidatA
    1. scrutini
    Guy Parmelin
    90
    Thomas Aeschi
    61
    Norman Gobbi
    50
    Thomas Hurter
    22
    Viola Amherd
    16
  • 11:19

    Resultats excellents tras la PPS

    Ils resultas fin ussa tras e tras relativ fin fitg auts en las elecziuns èn tenor il politolog Adrian Vatter d'attribuir a la PPS. Lezza haja consequentamain elegì ils anteriurs fin ussa, ha ditg Vatter ad SRF. La PPS haja fatg quai sapientiv per dar il signal a las autras partidas ch'ella spetga era il sustegn dals auters en l'elecziun da l'ultim mandat.

  • 11:06

    Ils Verds èn cunter la PPS

    Tenor Balthasar Glättli dals Verds na vegn lur partida betg surdar responsabladad da la PPS. Ina partida che ageschia cunter ils dretgs elementars e la separaziun da las forzas (manegiada è la clausula d'exclusiun).

    Sco emprims numnan ils Verds in'ulteriura raschun: Las dunnas na sajan betg represchentadas comensuradamain en il Cussegl federal, sch'i vegnia ussa elegì in um tenor las propostas da la PPS.

  • 11:03

    PS n'è betg entusiastica cun las propostas

    Il schef da la fracziun da la PS Roger Nordmann constatescha pauc entusiassem aifer la partida per las 3 propostas da la PPS. Vinavant tematisescha era Nordmann la clausula d'exclusiun da la PPS. Candidats da la PPS che vegnessan elegids senza esser sin la proposta uffiziala da la PPS stuessan sa retrair, ubain ch'i vegnan exclus da la partida. Quai cuntrafetschia a la constituziun ed è tenor Nordmann «scandalus».

    Pia nagina annunzia d'in eventual candidat selvadi. Resta da spetgar ils resultats da l'emprim scrutini, cura ch'i va lura propi per l'elecziun.

  • 10:55

    PBD constatescha «I n'è betg simpel» - PVL favuriseschan Gobbi

    La schef da fracziun da la PBD Rosmarie Quadranti undrescha in'ulteriura giada las prestaziuns da la cussegliera federala partenta Eveline Widmer Schlumpf. Durant ils «hearings» n'haja nagin dals candidats uffizials propi pudì sa profilar. La PBD renconuscha bain il dretg da la PPS d'avair in segund sez. La fracziun na recumonda però nagin candidat specific.

    Tenor Tiana Angelina Moser renconuscha era la PVL il dretg da la PPS sin in segund sez. Per els è surtut Norman Gobbi sa profilà en ils «hearings». Tuttina saja per inqualin dals Verdliberals in problem la biografia da Gobbi, ch'era anc fin questa stad tar la Lega dai Ticinesi.

  • 10:46

    PLD e PCD annunzian d'eleger confurm a las propostas

    Ignazio Cassis (PLD) appellescha da na far nagins gieus politics, da betg giugar cun las instituziuns politicas. La situaziun saja memia difficila. En quel senn èsi l'appell dad eleger in dals candidats uffizials. Vers la PPS ha ditg Cassis ch'ins spetgia lura era acziuns, e betg mo pleds da concordanza.

    Filippo Lombardi (PCD) annunzia che la fracziun vegnia ad eleger insatgi dals candidats uffizials. Ed era Lombardi appellescha a la PPS da suenter questas elecziuns - cun 2 cussegliers federals da la PPS - stoppia la partida però era turnar ad in politisar constructiv concordant. Ed era schliar la clausula d'exclusiun ch'ella ha en ils statuts.

  • 10:42

    Ussa vai per il sez vacant - PPS: «Igl è temp da star ensemen»

    Il schef da fracziun da la PPS Adrian Amstutz ha punctuà che la PPS vegli surpigliar responsabladad e suttastritga era che la PPS haja fatg 3 propostas valablas. El appellescha a la democrazia e pretenda da crear realitad en il Cussegl federal cun 2 commembers da la PPS. Tenor el sto quai esser 1 da las propostas.

    Suenter èsi mintga fracziun che po pigliar posiziun uffizialmain, avant ch'ils cedels d'elecziun vegnan repartgids.

    Adrian Amstutz, il schef da la fracziun da la PPS a Berna.
    Legenda: Adrian Amstutz, il schef da la fracziun da la PPS a Berna. SRF
  • 10:32

    Alain Berset è reelegì cun 210 vuschs

    L'actual minister da l'intern Alain Berset (PS) è reelegì cun 210 vuschs (il pli absolut 117).

    El è cusseglier federal dapi ils 14.12.2011. Pia sia emprima reelecziun.

    L'actual e futur cusseglier federal Alain Berset (PS).
    Legenda: L'actual e futur cusseglier federal Alain Berset (PS). Keystone
  • 10:20

    In resultat bun suenter l'auter - la tensiun crescha

    Sco proxim vai per l'elecziun dad Alain Berset che candidescha per in'ulteriura perioda d'uffizi. E suenter lura per il sez vacant.

    Il Cussegl federal ha durant il temp da las elecziuns betg access a la sala da l'Assamblea federala. Il Cussegl federal en corpore è sa retratg en la stanza dal Cussegl federal.

    couloir ed esch
    Legenda: Stanza da spetga dal Cussegl federal. Keystone
  • 10:14

    Johann N. Schneider Ammann è reelegì

    L'actual minister da d'economia, furmaziun e perscrutaziun Johann N. Schneider Ammann è reelegì cun 191 vuschs. Fitg bun resultat suenter las 159 vuschs avant 4 onns.

    El è cusseglier federal dapi ils 22.09.2010.

    Legende: Audio Tge che spetga il cusseglier federal Johann N. Schneider Ammann abspielen. Laufzeit 02:46 Minuten.
    02:46 min, RTR Audio dals 09.12.2015.
  • 9:57

    Simonetta Sommaruga è reelegida

    L'actuala ministra da giustia e presidenta da la Confederaziun è reelegida cun 182 vuschs (tar pli absolut da 111 vuschs). In fitg bun resultat resguardond ils dossiers difficils da la ministra da giustia e polizia.

    Simonetta Sommaruga (PS) è cussegliera federala dapi ils 22.09.2010.

    Legende: Audio Tge che spetga la cussegliera federala Simonetta Sommaruga abspielen. Laufzeit 01:56 Minuten.
    01:56 min, RTR Audio dals 09.12.2015.
  • 9:39

    Didier Burkhalter è reelegì

    L'actual minister da l'exteriur Didier Burkhalter è reelegì cun resultat fitg bun da 217 vuschs (tar pli absolut da 116). Uschia ha era el fatg in meglier resultat ch'il december 2011. El è cusseglier federal dapi 16.09.2009.

    Legende: Audio Tge che spetga il cusseglier federal Didier Burkhalter abspielen. Laufzeit 02:55 Minuten.
    02:55 min, RTR Audio dals 09.12.2015.

RR Actualitad bunura/mezdi/saira 06:00+