Il parlament federal

Il parlament svizzer, l'Assamblea federala, consista da duas chombras cun las medemas cumpetenzas, il Cussegl naziunal ed il Cussegl dals chantuns. Ella è la pussanza suprema da la Confederaziun, cun resalva dals dretgs dal pievel e dals chantuns.

La chasa federala a Berna.

Legenda da maletgs: Chasa federala a Berna. Keystone

Il Cussegl naziunal ed il Cussegl dals chantuns sa radunan separadamain. Las decisiuns da l'Assamblea federala ston omadus cussegls approvar.

Ils deputads dad omadus cussegls deditgeschan al mandat parlamentar var 60 pertschient da lur temp da lavur. Daspera lavuran els per regla en ina professiun betg parlamentara.

La repartiziun actuala en il Cussegl naziunal: PPS 57 sezs, PS 46 sezs, PLD 30 sezs, PCD 31 sezs, PES 15 sezs, PVL 12 sezs e PBD 9 sezs.

Legenda da maletgs: La repartiziun actuala en il Cussegl naziunal. RTR

Il Cussegl naziunal

Ils 200 sezs dal Cussegl naziunal vegnan repartids sin ils 26 chantuns tenor il dumber da la populaziun (dumber total d'abitantas e d'abitants = populaziun residenta). La basa furman ils registers che vegnan eruids en las enquistas fatgas in onn suenter las ultimas elecziuns. Mintga chantun ha dentant almain in sez.

Repartiziun actuala dal Cussegl dals chantuns. PCD 13 sezs, PS 11 sezs, PLD 11 sezs, PPS 6 sezs, PES 2 sez, PVL 2 sezs e PBD 1 sez.

Legenda da maletgs: Repartiziun actuala dal Cussegl dals chantuns. RTR

Il Cussegl dals chantuns

Il Cussegl dals chantuns sa cumpona da 46 represchentants dals chantuns svizzers. Ils chantuns Sursilvania, Sutsilvania, Basilea-Citad, Basilea-Champagna, Appenzell Dadora ed Appenzell Dadens elegian mintgamai in represchentant, tut ils auters chantuns mintgamai dus represchentants. Il chantun da Turitg che ha passa 1 milliun abitantas ed abitants elegia 2 represchentants, gist tuttina sco il chantun Uri che dumbra var 35'000 abitantas ed abitants.

L'Assamblea federala plenara

Il Cussegl naziunal ed il Cussegl dals chantuns negozieschan cuminaivlamain sco Assamblea federala plenara sut il presidi dal president dal Cussegl naziunal per:

  • eleger
  • resolver conflicts da cumpetenza tranter las autoritads federalas supremas
  • decider davart dumondas da grazia

L'Assamblea federala plenara sa raduna plinavant a chaschun d'occurrenzas particularas e per prender enconuschientscha da decleraziuns dal Cussegl federal.