PBD Grischun na fa nagins quitads

En in onn sa mida anc bler uschè il vicepresident da la partida burgais democrata dal Grischun Beno Niggli.

0.6% perda sia partida sin palanca naziunal tenor il barometer dad elecziuns da GFS, quai cumpareglià cun las elecziuns dal 2011.

Quitads na fa Beno Niggli dentant betg. La PBD saja etablida en il Grischun uschia ch'el quinta ch'els possian tegnair il sez da Hansjörg Hassler che banduna il cussegl naziunal en in onn. Uss saja quai da guardar tge colliaziuns da glistas ch'èn pussaivlas. El quinta cun ina allianza burgaisa cun ils liberaldemocrats ed ils cristiandemocrats. Decidì na saja dentant anc nagut.

PVL sin la dretga via

Auter èsi tar la partida verd liberala. Ella gudogna tenor la retschertga 1.9%. In bun segn è Christian Stricker, il president, persvas. Ins saja sin la dretga via sco i para. Dentant relativescha el in zic. Tar las elecziuns dal cussegl naziunal giaja quai er per colliaziuns da glistas. Là dettia quai anc bler da far. El è dentant optimistic ch'ils verd liberals vegnan da tegnair il sez da Josias Gasser en il parlament. Davart colliaziuns da glistas pussaivlas n’ha el dentant betg vulì tradir insatge.