«Migraziun» ed «Europa» èn ils quitads principals

Tenor la retschertga da gfs.bern per la SSR è il quità principal dals dumandads tut ils temas enturn la migraziun. Suandà da las dumondas enturn las relaziuns cun l'Europa e l'ambient.

Grafica Barometer dals quitads – il pli sisum Migraziun/esters e UE/crisa da l'euro/bilateralas.

Legenda da maletgs: SRG SSR/gfs.bern, barometer d'elecziuns 2015, 11.03 - 19.03.2015 (n=2'017). RTR

Ils quitads centrals èn cun distanza la migraziun (33%) e l'Europa (12%). Quests temas èn s'accentuads dapi l'ultim barometer d'elecziuns da l'october 2014. Quests temas èn era creschids il pli fitg: omadus per radund 4 puncts.

Cun distanza clera suonda in bloc cun las tematicas da l'ambient, da la dischoccupaziun ed enturn la sanadad publica. Dumondas da famiglia e davart l'energia - ch'eran en il center da votaziuns l'ultim temp - suondan pli tard.

Regressivs en cumparegliaziun cun l'october èn però las tematicas enturn la dischoccupaziun e las cassas da malsauns.