Siglir tar il cuntegn
cuntegn

Elecziuns Frantscha 2017 Macron: Gronda sfida è da persvader ils electurs

L'emprim pass è fatg: Emmanuel Macron è vegnì elegì sco nov president da la «Grande nation». Quai munta dentant betg, ch'el po ruassar e simplamain cumenzar a guvernar il pajais. Sin il nov «président» spetga blera lavur.

Anc è Emmanuel Macron persul - el sto uss emplenir il nov parlament cun sia glieud.
Legenda: Anc è Emmanuel Macron persul - el sto uss emplenir il nov parlament cun sia glieud. Keystone

Dus terzs dals Franzos han dà lur vusch ad Emmanuel Macron. L'emprim pass è pia dumagnà. La gronda lavur spetgia dentant anc sin il nov-elegì, quai di Charles Liebherr il correspundent dad SRF a Paris. Macron stoppia uss numnadamain sa metter vid l'elecziun dal nov parlament. Il mument haja ses moviment «En marche!» nagins sezs - Macron stoppia damai empruvar da chattar ina maioritad or dal nagut.

Las grondas sfidas spetgan uss

La pli gronda sfida saja dentant da persvader ils electurs. La dumonda è tenor Charles Liebherr, sch'ils electurs hajan la pazienza da spetgar sin ils fritgs dal program da refurma. Macron stoppia uss numnadamain durant circa l'emprim mez onn metter ils sems e lura saja la sfida da guardar, che l'atmosfera na cupitga betg durant il temp ch'igl è da spetgar sin la racolta dals fritgs.