Siglir tar il cuntegn
Inhalt

Elecziuns Frantscha 2017 Frantscha: Nagina allianza da sanestra

En Frantscha na datti nagin’allianza da sanestra. Avant l’elecziun dal president na sajan il socialist Benoît Hamon ed il candidat independent Jean-Luc Mélenchon betg sa cunvegnids.

Tant il socialist Benoît Hamon sco er il candidat independent Jean-Luc Mélenchon han communitgà, ch'els hajan en puncts centrals differenzas memia grondas. Uschia n’ha probabel nagin dals dus politichers la schanza da cuntanscher l’elecziun decisiva il matg, manegian ils experts.

Sondagi vesa Emmanuel Macron a la testa

En in sondagi da l’institut Odoxa sin incumbensa da Franceinfo vegn Hamon a far en l’emprima runda da l’elecziun il quart plaz avant Mélenchon en plazza tschintg. Tar la segunda runda vegnia il candidat independent Emmanuel Macron a gudagnar probablamain claramain avant la candidata da la partida dretg-extrema Front National FN, Marine Le Pen.

La fin d'emna è il cumbat electoral franzos vegnì pli malvulent

La fin d'emna èn daventadas duas giadas occurrenzas electoralas da Marine Le Pen mira d'attatgas: Dumengia han persunas mascradas franà e donnegià plirs bus cun aderents da Le Pen datiers da Nantes. Gia il di avant avevan radund 2'000 persunas empruvà da disturbar in'occurrenza da Le Pen a Nantes.

Marine Le Pen ha appellà a ses aderents da far adatg che las elecziuns na vegnian betg enguladas.

Il candidat conservativ François Fillon ha pretendì da la regenza da procurar per in andament regulà da las elecziuns.

La prima runda d’elecziun è ils 23 d’avrigl, la segunda ils 7 da mai.

Las elecziuns franzosas

Las elecziuns per il presidi franzos vegnan observadas pervi da Marine Le Pen en il mund. Blers teman, ch'ella haja schanzas da vegnir presidenta. L’emprima runda d’elecziun è ils 23 d’avrigl. Ils experts spetgan, che nagin candidat cuntanscha il pli absolut (50%+). La segunda è ils 7 da mai tranter ils dus candidats cun las pli bleras vuschs.