Siglir tar il cuntegn
cuntegn

Elecziuns Frantscha 2017 Duell elecziuns Frantscha: 3:0 per Macron

Er en il davos duell avant las elecziuns ha il candidat liber Emmanuel Macron persvas. Uschia prefereschan 63% da las aspectaturas ed ils aspectaturs Macron. La candidata dal Front National Marine Le Pen vegn sin 34%.

Marine Le Pen ed Emmanuel Macron curt avant la debatta.
Legenda: Marine Le Pen ed Emmanuel Macron curt avant la debatta. Keystone

Èn paucs puncts èn ils dus candidats per il presidi franzos dil medem avis. Sch’i va dentant per cumbatter il terrorissem èn els d’accord. Omadus lessan auzar il budget per la defensiun per savair proteger meglier la tiara.

Uschiglio èn ils dus candidats da differents avis tge ch’è il meglier per la Frantscha. Fertant che Marine Le Pen less extrar da l’Uniun Europeica less Emmanuel Macron integrar anc meglier la Frantscha en l’UE e salvar igl Euro. Plinavant less Macron mantegnair la lètg da omosexuals en Frantscha, sia adversaria perencunter è encunter quella. Era tar las rentas han els differentas ideas.

Davosa debatta

Ier saira è stada la davosa e la pli impurtanta debatta en connex cun las elecziuns en Frantscha. Passa duas uras han il candidat liber Emmanuel Macron e la candidata dal Front National debattà. Gudagnà ha tenor ina retschertga grad suenter il duell Emmanuel Macron, el ha persvas 63% dals aspectaturs. Marine Le Pen be 34%. El aveva gia en las duas emprimas debattas, cura che tut ils 11 candidats eran anc en la cursa gia persvas ils pli blers aspectaturs.

Duell dir

Il candidat per il presidi franzos Emmanuel Macron stettia per ina globalisaziun selvadia, ina brutalitad sociala ed ina guerra da tuts cunter tuts. Quai ha reproschà a l'independent la candidata populista da la dretga Marine Le Pen.
Macron ha returnà che Le Pen malegia in purtret negativ da la Frantscha e ch'ella derasia manzegnas e absurditads.

L'elecziun è dumengia proxima ils 7 da matg.

RR actualitad 07:00