La Partida socialdemocratica ha chattà enfin uss 117 candidatas e candidats, l'Allianza dal center 110, ils liberaldemocrats quintan cun tranter 115 e 120, la Partida populara haja er sur 100, ed ils verd-liberals van cun 46 persunas en la cursa. Quintà ensemen èn quai bunamain 500 persunas ord 39 cirquits electorals che candideschan per 120 sezs – ina schelta sco anc mai.
Circa in terz da quellas persunas che candideschan, pudessan esser dunnas, uschia che las chartas en il parlament dal Grischun vegnan cun il proporz dubel maschadadas da nov. Per resumar las prognosas dals presidents da las partidas pon ins dir: La PS, la PPS ed er ils verd-liberals gudognan, sin donn e cust da l'Allianza dal Center e da la PLD, che vegnan a stuair laschar las pli bleras plimas.
Surpraisas en las regiuns
Dentant tge ha la tschertga da candidats mussà a las partidas? Nua ston ellas spezialmain far reclama e nua vesan ellas las pli grondas schanzas da gudagnar?
Ils verd-liberals hajan cunzunt chattà candidatas e candidats en las regiuns Partenz e Plessur. Là vesan els er il pli grond potenzial da gudagnar sezs, di Géraldine Danuser, la presidenta da partida. La Partida populara ha tenor lur president, Thomas Gort, chattà en mintga cirquit candidatas e candidats. Interessantamain saja quai dentant stà il pli grev en lur regiun da coc, il Partenz. Gort sa declera quai uschia:
Qua avain nus blers cirquits dad ina persuna cun deputadas e deputads ch'èn gia en il Cussegl grond – e quels na vuleva nagin concurrenzar.
Il pli grond potenzial per la PPS da gudagnar sezs vesa el en il cirquit da Cuira. Là èn percunter ils socialdemocrats enfin uss adina stads ferms. «Forsa che nus perdain a Cuira intgins sezs, dentant nus avain en las regiuns, sco per exempel en Surselva ubain en las valladas talianas, bleras candidaturas, uschia che nus sperain da gudagnar là insaquants sezs», di il president Andri Perl.
L'Allianza dal center, ch'è la pli gronda partida, ha er chattà en quasi tut ils cirquits candidatas e candidats per emplenir las glistas. Spezialmain plaschair ha il co-president Kevin Brunold da la glista da Tavau:
Là avain nus pudì cuntanscher ina midada da vegliadetgna ed jau avess plaschair, sche nus gudagnassan quels sezs.
Ils liberaldemocrats vegnan a stuair laschar las pli bleras plimas tar las elecziuns. Perquai emprovan els «da tegnair insaquants sezs da coc e da forsa conquistar in u l'auter sez en ils cirquits d'ina persuna», di il president Bruno Claus.
Pia, per resumar: Ils verdliberals e la PPS speran da gudagnar sezs en ils cirquits gronds, la PS speculescha sin dapli sezs en las regiuns, l'Allianza dal Center è la pli gronda partida e perquai dapertut in pau optimistica – e la PLD cumbatta cun pes e mauns per mintga sez ch'ella po salvar.
Insaquants chaus
Dentant per ir per vuschs, dovri er persunalitads simpaticas che pon rimnar vuschs. Insaquantas persunas tradeschan las partidas gia: La PLD per exempel ha Urs Cadruvi, che candidescha per il cirquit Mustér. Per la PS da Maiavilla candidescha l'autur Köbi Gantenbein. Thomas Roffler, il president dals purs Grischuns va en la cursa per la PPS. Per l'Allianza dal Center candidescha Sandra Maissen, cussegliera da la citad da Cuira e Tamara Henderson, presidenta dals hoteliers da Tavau – e sin ina glista verd-liberala vegn a star Nora Saratz Cazin.
In parlament pli divers
Er quai che pertutga dunnas, vegliadetgna e professiuns empermetta il nov parlament da daventar pli divers. Las partidas han chattà davent da la visagista, il medi, il pur, la tgirunza, l'advocat fin al venda-peschs differentas professiuns, che fan il Cussegl grond forsa pli sgiaglià. Ina candidata pudess schizunt er sbassar la vegliadetgna da media, sch'ella vegn elegida. La candidata da la PLD da Küblis survegn numnadamain 18 onns exact il di d'elecziun, ils 15 da matg.