Siglir tar il cuntegn
Inhalt

Duas dunnas - ina missiun Duas dunnas – ina missiun

La surmirana Patricia Scarpatetti e l’Engiadinaisa Graziella Ramponi han bler communabel: Omaduas èn idas en l’exteriur per far in voluntariat e gidar uffants en miseria. Omaduas èn turnadas, han sentì che gidar è lur missiun ed èn emigradas per fundar ina chasa d’uffants. Omaduas avant 10 onns.

patricia scarpatetti che tegn uffant - ed in auter che chanta
Legenda: Patricia Scarpatetti tar activitads cun «ses» uffants en las Honduras. TR, Paula Nay

Patricia Scarpatetti viva cun 36 uffants a San Pèdro Sula en las Honduras, ina da las pli privlusas citads dal mund. Lur dachasa è circumdà da mirs da segirezza e fils d’atschal. Pudair gidar uffants en miseria haja dà ad ella in nov senn en la vita, di Patricia Scarpatetti.

Jau ma sent responsabla per quests uffants e na vi betg bandunar els.
Autur: Patricia Scarpatetti«Yo quiero ser», San Pèdro Sula (Honduras)

Manar la chasa d’uffants «Yo quiero ser» è per ella betg ina lavur, mabain in privilegi. In che dovra blera energia. Ella n’è betg mo organisatura, mabain era educatura, scolasta, tgirunza, psicologa e cumbatta per ils dretgs dals uffants avant dretgira. Malgrà ch’ella è fitg liada, na vul ella betg turnar en Svizra.

Graziella Ramponi è sa decidida da gidar uffants cun HIV en Tailanda

patricia scarpatetti cun uffant sin bratsch
Legenda: Graziella Ramponi cun in da «ses» uffants en la citad. TR, Paula Nay

Graziella Ramponi viva a Mae Sai, la citad il pli en il nord da la Tailanda. Pudair gidar uffants ch’èn infectads cun HIV dettia ad ella blera cuntentientscha, di Graziella Ramponi. Sia chasa d’orfens «Baan Doi» dat in nov dachasa ad uffants ch’èn infectads. Ils uffants ston prender duas giadas a di medicaments che gidan a tegnair il virus sut controlla. Sia rolla saja quella d’ina sora gronda, insatgi che saja qua per ils uffants e possia gidar.

Graziella Ramponi viva en il conturn da la chasa cun sias duas figlias e ses um. Era sch’ella sa sentia suenter 10 onns bunamain sco ina Tailandaisa, datti anc adina differenzas da mentalitad.

Legende: Video Ramponi e sia vita privata en Tailanda abspielen. Laufzeit 04:30 Minuten.
Or da Telesguard dals 14.12.2017.

TR Telesguard, 17:40