Siglir tar il cuntegn

Header

Navigaziun

cuntegn

Gottard 2016 - persunas Marc Maissen - il mecanist dal Bohr-Jumbo

Sco mecanist ha Marc Maissen procurà durant bunamain 10 onns che tut las maschinas dal plazzal da la Neat a Sedrun funcziunavan.

Marc Maissen.
Legenda: Marc Maissen. RTR, C. Albin

Lavurar sco mecanist sin il plazzal da la Neat a Sedrun è stà spezial, sco Marc Maissen raquinta. 10 onns ha el lavurà en squadras da 10 fin 12 mecanists, 800 meters sut terra, cun temperaturas da fin 50 grads ed ina umiditad da l'aria da 90%. Ina lavur ch’ins na sappia betg cumparegliar cun la lavur da mecanist sin in plazzal normal.

El era in dals mecanists responsabels per reparar e mantegnair tut las maschinas dal plazzal, davent da camiuns, sur exchavaturs, fin la gronda maschina da furar, il Bohr-Jumbo. Entras questa lavur haja Marc Maissen emprendì bler sur da sistems idraulics e l’electronica da maschinas grondas. Las temperaturas e l’umiditad en il tunnel hajan dentant era gì ina influenza sin sia sanadad ed el senti mintgatant il dies ni la schanuglia. D’avair lavurà 10 onns en il tunnel da la NEAT n’è el dentant mai stà mal.