Siglir tar il cuntegn

Header

cuntegn

Allegra Vorarlberg… Ruaus enturn «Schlafes Bruder»

Cun ses roman da debut ha Robert Schneider gì in success immens. E malgrà ch’el ha edì anc ina pluna autra litteratura suenter «Schlafes Bruder» ha el mai pli pudì cuntanscher il success da ses emprim roman.

Il 1992 ha Robert Schneider edì ses emprim roman: «Schlafes Bruder». E ses roman da debut ha gì in success enorm. Quel è vegnì translatà en 36 linguas ed ha purtà a l’autur ina massa premis e distincziuns.

Mintgin che fa art è donnegià

Robert Schneider di ch’el saja stà «fermamain donnegià» cura ch'el haja scrit «Schlafes Bruder». El haja gì differents cumplex.

La vita duai salvar nus da l’art.
Autur: Robert SchneiderScriptur

Nietzsche haja ditg ina giada, che l’art salvia nus da la vita, el saja dentant da l’avis che la vita manglass salvar nus da l’art - perquai che mintgin che fetschia art saja donnegià.

Smess da scriver

Suenter «Schlafes Bruder» ha Robert Schneider anc scrit tschintg ulteriurs romans ed ina novella. Cunquai ch’il success n’è betg sa repetì, ha el decidì da smetter cun il scriver. Oz è l’um d’annada 1961 um da chasa. El è responsabel per ses trais figls da set, tschintg e dus onns. Sia dunna è pilota. Empè da scriver producescha Robert Schneider uss films documentars.