Siglir tar il cuntegn
cuntegn

Allegra Vorarlberg… Doppelmayr/Garaventa – records per l'entir mund

Las pendicularas da la firma Doppelmayr/Garaventa surmuntan ils pli blers meters d’autezza ed ellas èn las pli lungas dal mund. En 90 pajas portan ellas turists ed indigens d'in lieu a l’auter. Tranter auter era en la Corea dal Nord.

Ekkehard Assmann declera betg mo la tecnica dals indrizs ad Alice Bertogg.
Legenda: Ekkehard Assmann na declera betg mo la tecnica dals indrizs ad Alice Bertogg. RTR/ORF/Ch. Suter

La vischnanca da Wolfurt dumbra 8‘200 abitants. La firma Doppelmayr/Garaventa ha sia sedia principala ed ina part da la producziun a Wolfurt ed occupa là 1'100 collavuraturAs. Sin l’entir mund lavuran 2'500 persunas per la firma da meds da transport.

Actualmain furnescha la firma Doppelmayr/Garaventa in tren per in eroport en Russia.
Legenda: Actualmain furnescha la firma Doppelmayr/Garaventa in tren per in eroport en Russia. RTR/ORF/Ch. Suter

Dapli che be sutgeras

La firma Doppelmayr/Garaventa è enconuschenta tar nus sco producenta da sutgeras. Ma la firma construescha era gondlas, pendicularas e trens. Dal Canada fin a Katar ed actualmain en Russia furneschan els trens che collian ils differents terminals dals eroports.

A nus na vai betg per records mundials. Nus vulain bajegiar qualitad – indrizs, cun ils quals noss clients pon gudagnar daners.
Autur: Ekkehard AssmannDoppelmayr/Garaventa

Co Kim Jon-Un è vegnì tar ina sutgera da Doppelmayr/Garaventa

L’onn passà ha la pressa internaziunala rapportà che la Corea dal Nord haja cumprà ina sutgera da la firma Doppelmayr/Garaventa. Ekkehard Assmann, il manader da marketing da la firma, ha intervegnì quai tras in telefon da la New York Times. A la firma n’era dentant betg enconuschent d’avair fatg fatschentas cun il regime da Kim Jon-Un ed uschia han els lantschà las retschertgas.

Betg mo las colurs da la pulstrada èn differentas, era il confort è tar mintga sutgera in pau auter.
Legenda: Betg mo las colurs da la pulstrada èn differentas, era il confort è tar mintga sutgera in pau auter. RTR/ORF/Ch. Suter

Il 2014 ha il territori da skis dad Ischgl serrà la Pardatschgratbahn. Ina firma dal Vorarlberg che venda vinavant indrizs d’occasiun ha cumprà questa sutgera e vendì ella ad ina firma chinesa. E da là e la sutgera da Doppelmayr/Garaventa vegnida vendida vinavant en la Corea dal Sid.