2'500 giuvenils, 400 gidantras e gidanters, 300 trenadras e scolasts da sport e 12 differentas disciplinas. Da schonglar dals plans da turnier enfin reparter da mangiar e da baiver dovri ina massa lavur d'organisaziun, di il president dal comité d’organisaziun Thierry Jeanneret. Per tut quellas disciplinas vegnan numnadamain passa 30 differentas hallas da gimnastica, bogns ed auters indrizs da sport a Cuira nizzegià. Sco era ina halla a Trimmis ed in plaz da ballarait a Domat.
Nus ans legrain ch’il di da sport da scola è quest onn a Cuira. Sche tut ils chantuns sa participassan fiss el per puspè en 26 onns en il Grischun.
In’occurrenza speziala
Il di da sport da scola naziunal saja ord differentas raschuns in’occurrenza speziala, di Thierry Jeanneret. Per l’ina ils massa giuvenils, che vegnan vitiers anc da l’entira Svizra e per l’autra ch’i è in'occurrenza cun uschè bleras differentas disciplinas.
Grond plaschair anticipà
Malgrà las sfidas organisatoricas, sa legra il president dal comité d’organisaziun e ses team ch’i è finalmain uschè lunsch. Pervia da la pandemia han els stuì spetgar dus onns per pudair manar atras questa concurrenza da sport. Uss sa legra Thierry Jeanneret da pudair porscher a giuvenils questa concurrenza e che lez han plaschair da far sport.
Visita tar la disciplina unihoc
La davosa classa da la scola Quader a Cuira è sa qualificà cun in team da giuvnas ed in team da giuvens al di da sport da scola naziunal tar la disciplina unihoc.
Il pli bel è da dar unihoc ensemen cun mias amias da classa avant che tuttas cumenzan lura la stad cun in emprendissadi.
Accumpagnadas vegnan las duas equipas dal scolast Vendelin Cabernard. Per el èsi ina onur ch’ils dis da sport da scola naziunals han quest onn lieu a Cuira. El chatta er fitg bel che scolaras e scolars da l'entira Svizra vegnan ensemen e fan ensemen sport.