Pli vegl ch'ins vegn, pli fitg vegnan ins contemplà da la societad sco creatira asexuala.
Tut quai che haja da far cun sexualitad saja in desideri elementar. Era persunas pli attempadas hajan desideris, ma anc oz na vegnia betg discurrì avertamain davart la tematica sexualitad en la vegliadetgna, di la terapeuta sexologica da corp Jacqueline Stamm.
Daventar vegl – midadas
Cun vegnir pli vegl sa mida era il corp. Ins na possia betg pli sa muventar uschè agil sco anc pli baud. La midada d'ormons possia procurar ina sperdita da la libido. Tar las dunnas po il midament dals ormons procurar per ina mucosa da vagina pli sitga.
Quasi mintg'um vegn pli baud u pli tard confruntà cun problems d'erecziun.
Problems d'erecziun possian ins per exempel survegnir pervia da medicaments ch'ins stoppia prender u fitg radical suenter in'operaziun da la prostata. Er saja pussaivel ch'il partenari mora ubain che in dals partenaris na veglia simplamain betg pli proximitad corporala u intimitad, e bler na vegnia betg discurrì dals desideris, giavischs u dal frust. Il privel da daventar solitari, er en in partenadi saja fitg grond. Sch'ins saja sulet en la vegliadetgna na saja er la tschertga dad in partenari insumma betg simpel.
La glieud n'ha betg emprais da discurrer da lur atgna sexualitad.
Problems
Practicas che hajan fin uss funcziunà na funcziuneschian per part tuttenia betg pli. Sper las midadas corporalas cun vegnir pli vegl saja il betg discurer davart la sexualitad en la vegliadetga in grond problem. Er saja la sfera privata en ina chasa da tgira fitg pitschna. Perquai ch'ins na possia per gronda part betg tge offertas ch'il detti davart la sexualitad en la vegliadetgna vegni magari fatg attent en moda e maniera disfavuraivla sin ils desideris sexuals. I vegnia forsa fatg remartgas obscenas u tutgà il sain dad ina tgirunza. Cun ina demenza che cumenzia vegnian las retegnientschas savens pli pitschnas.
I po capitar che in signur pli vegl è sin balcun da sia chombra en la chasa da tgira, sa tira ora e cumenza a masturbar. I vegn puspè vivì dapli tenor il prinzipi da gust. Ins n'è betg pli uschè socialisà.
Agid e sustegn
Tar problems dad erecziun na bastia betg simplamaing da prender ina pirla sco per exempel viagra. Blers umens s'hajan identifitgà sur lur potenza, e quai fatschia era insatge cun la persuna. Quai giaja bler pli a funs, las persunas sajan malsegiras. Sch'insatge na funcziuna betg pli sco pli bauld, lura dettia in process da tristezza, prender cumià e sa scuvrir da nov. Cun sentir sa sez, tutgar, contact corporal e sche la persuna sappia era acceptar sasez puspè saja bler svilup pussaivel e quai en bleras domenas e tematicas. La terapeuta da corp sexologica mussia a lur clents e clientas co ch'els possian tutgar e massar in l'auter plain plaschair, da chattar novas vias per viver la sexualitad.
Jau vuless accentuar ch'ins n'ha betg be pli «Kuschelsex» en la vegliadetgna. Il sex in zic pli dir ha era anc lieu en vegliadetgna augmentada. I dat studis che cumprovan che glieud tranter 65 e 80 ha dapli sex che quels tranter 18 e 25.
I duess vegnir discurrì pli avert davart la sexualitad en la vegliadetgna. Cun entrar en ina chasa da tgira pudessan ins dumandar sch'il client u la clenta haja anc desideris sexuals. Ubain sche el u ella haja forsa in marus u ina marusa. Era duess tenor Jacqueline Stamm il persunal da tgira vegnir sensibilisà dapli davart quella tematica. Ins duessia discurrer pli avertamain da sex en la vegliadatgna ed infurmar la glieud pli attempada profilacticamain davart las pussaivladads da sustegn tar tematicas sexualas.
Sexualitad en la vegliadetgna na duess betg esser in tabu. I duess vegnir discurrì avertamain davart quella tematica.