Siglir tar il cuntegn
cuntegn

Dal lontan el Grischun Oldrich Jindra – trenader da hockey passiunà

Dapi passa diesch onns lavura ed abita Oldrich Jindra, oriund da la Tschechia, en Svizra. Ils ultims trais onns a Scuol tar il Club da hockey Engiadina.

La gronda passiun dad Oldrich Jindra è il hockey. L’um da 37 onns ha fatg sia gronda passiun tar sia professiun. Suenter il gimnasi ed il studi a l’universitad da Pilsen en Tschechia ha Oldrich Jindra fatg tut ils pass da la scolaziun sco trenader. Sias emprimas staziuns sco trenader professiunal eran en l'Austria, en Germania ed en Slovachia. Dapi varga diesch onns lavura Jindra en Svizra. Actualmain tar il club da hockey Engiadina.

Hockey – da la damaun a la saira

Tar il club da hockey Engiadina è Jindra l’emprim trenader professiunal. El s’occupa da tut ils stgalims da juniors fin tar l’emprima equipa dal CDH Engiadina che dat actualmain en la segunda liga da hockey. Durant questa stagiun è il CDH sa qualifitgà per ils playoffs. Uschia ch'il trenader oriund da la Tschechia n’ha betg gì problems da relegaziun cun sia emprima equipa.

En Svizra è la glieud maldisada

La vita en Svizra ed en spezial er en Engiadina Bassa è tut autra che la vita che Oldrich Jindra enconuscha da la Tschechia. En ses pajais mamma vivian ins dal maun en bucca. Ins lavuria per vegnir atras. En Svizra saja quai tut auter. Gia ils giuvens siemian dad auters pajais, da viadis en l'Australia u lura en il Canada. Tut chaussas ch'el haja pir pudì sa lubir cun lavurar tar nus en Svizra.

Era l’educaziun saja dal tuttafatg differenta. Las aspectativas dals geniturs als agens uffants èn pli grondas. Geniturs n'acceptian per exempel betg ch'ina scolaziun vegnia rutta giu.

Cun la famiglia a Scuol

Dapi l’avust da l’onn passà è la vita dad Oldrich Jindra sa midada considerablamain. Ils 14 d’avust èn el e sia dunna vegnids per l’emprima giada geniturs. Lura è naschida la figlia Nella. Dapi lura stat Nella en il center dal temp liber dad Oldrich Jindra. Interessant è era il fatg ch'il trenader tschec ha maridà ina dunna da la Tschechia. Ina dunna ch'el è vegni a conuscher a Scuol en Engiadina Bassa.

RR sportissimo 17:00