Siglir tar il cuntegn
cuntegn

Dal lontan el Grischun «Jau hai duas patrias»

L'onn 1968 ha Josef Sedlacek autostop a Prag ed ha uschia emprendì d'enconuscher in Svizzer che discurriva franzos. El ha organsià che Sedlacek ha pudì vegnir en Svizra ad emprender franzos. A Turitg è el s'inamurà en in'Engiadinaisa ed è restà.

Legenda: Guardar il video Dal lontan el Grischun - Sedlacek. Durada 02:53 minutas.
Or da RTR dals 16.06.2017.

Josef e Maria Sedlacek han emprendì d'enconuscher in l'auter a Turitg en ina bar. I saja stà amur sin l'emprima egliada. Ch'ella maridia in um da la Tschechia haja dà in pau da discutar a Sent, dentant be a l'entschatta, di Maria Sedlacek.

I dettia schon differenzas tranter las culturas. «Ils Tschecs san adina tut ed ils Rumantschs taschan pli savens», raquinta Josef Sedlacek. Sia dunna ha stuì sa disar, ch'ils Tschecs na fan betg tut las chaussas immediat, mabain spostan gugent sin damaun.

Ils Tschecs san adina tut ed ils Rumantschs taschan pli savens
Autur: Josef SedlacekSent
Legenda: Guardar il video Clip Josef Sedlacek. Durada 00:16 minutas.
Or da RTR dals 14.06.2017.

Cu el ha gì finì da studegiar, han els vulì bandunar la citad ed ir a viver en la patria dad ella, Sent. Il fisicher Josef Sedlacek ha fundà là si'atgna firma che producescha regulaturs per l'industria.Da quest temp na devi strusch talas firmas en il Grischun.

El ha spert emprendì Rumantsch ed è s'engaschà en la cultura. Quai sco dirigent e chantadur en differents chors.

Josef e Maria Sedlacek van per ordinari ina ga ad onn a far vacanzas en Tschechia. El na posseda betg pli il pass tschech, mabain mo pli il pass svizzer. El haja dentant duas patrias, Prag e Sent.