Siglir tar il cuntegn
Inhalt

Dal lontan el Grischun Ina plazza d'emprendissadi sco motivatur per emprender la lingua

Senza dumagnar la lingua n'èsi betg pussibel da chattar ina plazza d'emprendissadi en il Grischun. Quai sentan blers giuvens e giuvnas in tar in. Els èn vegnids «dal lontan el Grischun» ord ils pli differents motivs. La «Scola Vinavon» a Glion dat la pussaivladad d'emprender la lingua da fund ensi.

Legende: Audio Mezdi: Sin visita en la «Scola Vinavon» a Glion abspielen. Laufzeit 04:44 Minuten.
04:44 min, Actualitad dals 01.03.2018.

Il di da la visita èn set giuvens en classa. Lur derivanza è differenta. Els èn vegnids da Venezuela, da la Spagna, da l'Italia ed era quatter giuvens da l'Eritrea èn en la classa dal scolast Vitus Dermont. Ensemen emprendan els pleds, emprendan da communitgar e discurran da la cultura da lur pajais.

Tudestg è la lingua ch'els dovran era per discurrer ensemen. Quai na saja betg adina simpel, dian els. Dentant era il contact cun ils auters scolars da la scola pussibiliteschia dad exercitar la lingua. Grev da chapir saja dentant il dialect.

Tuts scolars raquintan che la finamira saja da chattar ina plazza d'emprendissadi – ubain en la construcziun, sco mecanist ubain era en la tgira. Senza lingua na va quai dentant betg. E perquai sajan els fitg motivads, di il scolast Vitus Dermont.

ina classa en scola.
Legenda: En la Scola Vinavon a Glion pon ins emprender tudestg. Il scolast Vitus Dermont mussa il tudestg da fund ensi. RTR / Esther Berther

RR actualitad 12:00