Siglir tar il cuntegn

Header

audio
Nora Kaiser è per l'emprima giada en il team da cumbat
Or da Actualitad dals 14.03.2022.
abspielen. Laufzeit 3 minutas 51 Sekunden.
cuntegn

Cumbat electoral PS Nora Kaiser – per l'emprima giada en il team da cumbat

Nora Kaiser è secretaria da la Partida socialdemocratica dal Grischun, candidata per il Cussegl grond e commembra dal team da cumbat. La finamira è che lur cusseglier guvernativ Peter Peyer vegn reelegì e da far uschè blers sezs sco pussaivel en il parlament.

Surstada da la blera lavur n'è Nora Kaiser betg. Surtut l'entschatta da l'onn haja magari dà dis che avessan duvrà dapli che 24 uras, di la giuvna politicra. La collavuraziun cun il presidi da la partida e l'entir team saja fitg buna e sias experientschas enfin ussa dal tuttafatg positivas. Nora Kaiser ha adina guardà ch'ella haja sper sia lavur sco scolasta al gimnasi ed en il team da cumbat anc almain in di da recreaziun per far insatge per sasezza e tancar nova energia.

Grazia a la lavur da team n'e il squitsch betg sulettamain sin las spatlas dad ina persuna.
Autur: Nora Kaiser secretaria da la PS e commembra dal team da cumbat

Chattar chaus e coordinar tut

Ina da las grondas sfidas saja stada da chattar e motivar tut la glieud per la glista communabla cun la Verda per il Cussegl grond. Cun il nov sistem d’eleger han las partidas stuì tschertgar ina massa candidatas e candidats per emplenir ils plaz da glista. Chattà han els a la finala 117 persunas che stattan a disposiziun, sulettamain en il circul Avras e Val Müstair n'han els chattà nagin. Mintga candidat e mintga candidata stoppia propi esser persvadida dal tuttafatg. Là hajan els sco team fatg tut pussaivel per motivar. In'autra sfida saja stada da crear in nov layout ensemen cun la Verda e da coordinar tut.

La gronda lavur dal team da cumbat è fatga. Ussa èsi vida mintga candidat e mintga candidata da persvader la populaziun da votar per el ni ella.
Autur: Nora Kaiser secretaria da la PS e conmembra dal team da cumbat

Persunalmain sa legra Nora Kaiser da seser ensemen cun la gruppa da cumbat ils 15 da matg e sperar dad alura pudair esser cuntenta cun ils resultats uschia ch'i vala da far in viva cun in bun magiel vin da cuminanza.

RTR actualitad 17:00

Artitgels legids il pli savens

Scrollar a sanestra Scrollar a dretga