Slovenia restrenscha entrada da fugitivs

La Slovenia vul limitar il dumber da fugitivs che vegnan en il pajais. Quai pervi che l'Austria vul far il medem pass. La Croazia saja infurmada davart quests plans, communitgescha il ministeri da l'intern sloven.

Schuldads austriacs erigian ina saiv al cunfin tranter l'Austria e la Slowenia a Spielfel (maletg d'archiv).

Legenda da maletgs: Schuldads austriacs erigian ina saiv al cunfin tranter l'Austria e la Slowenia a Spielfel (maletg d'archiv). Keystone

La regenza a Ljubljana n’ha betg fatg indicaziuns pli exactas davart la limitaziun da fugitivs. L'Austria aveva communitgà la dumengia da vulair limitar l'entrada da fugitivs al post da cunfin il pli impurtant cun la Slovenia.

Limitar il dumber sin 1'000 per di

La Slovenia da sia vart vul era laschar entrar damain fugitivs, e quai a partir da glindesdi. Ella vul che mo pli 1'000 fugitivs passian il cunfin mintga di per ir en l'Austria.

Il schaner passà aveva l’Austria infurmà da retschaiver quest onn be pli 37’500 fugitivs. Quai correspunda a la mesadad dal dumber dals radund 90’000 fugitivs da l’onn 2015. Lura era il chatsch da fugitivs sur la ruta dal Balcan s’intensivada dramaticamain. Dal Balcan anora sa mettan ils migrants e fugitivs cunzunt en viadi per la Germania, la Svezia e l’Austria.

RR novitads 06:30