Siglir tar il cuntegn

Chatscha 2018 Cuntraversa a chatscha: Spetgar u trair sch'ins ha gia preda?

En il Puschlav han bab e figl sajettà aifer paucas uras 10 tschiervs. Ord vista biologica na saja quai betg in problem. Discussiuns provochescha ina tala preda dentant tuttina.

ILs dus chatschaders cun lur preda da 10 tschiervs.
Legenda: Ils dus chatschaders Puschlavins han fatg gronda preda il terz di da chatscha. MAD

Bab e figl en sa mess en posa per far ina fotografia cun lur preda dad in di: 10 tschiervs. Questa fotografia è stada da vesair en la gasettas da las valladas dal sid «Il Grigione Italiano».

Cun gronda fortuna hajan ils dus chatschaders dal Puschlav pudì sajettar ils trais da settember en la regiun da la Val Scüri e La Rosa 10 tschiervs.

Per ils ins en urden ...

Tenor il manader da l’Uffizi da chatscha e pestga dal Grischun Adrian Arquint n’haja il chantun nagut encunter ina tala preda – quai uschè ditg ch'ils tschiervs sajan vegnids sajettads a moda correcta.

I saja impurtant ch’i vegnia sajettà per uschia regular il dumber da selvaschina. Tge che mintga chatschader fetschia lura cun la preda, fotografar e publitgar quai stoppia mintgin savair sez.

... e per ils auters in no-go

Auter vesa quai Marion Theus, ch’è presidenta da l’Uniun svizra per la protecziun d’animals selvadis e s'engascha per ina chatscha pli etica en il chantun Grischun. Tenor ella è quest'acziun sgarschaivla, quai n'haja betg pli da far bler cun chatscha. I giaja simplamain per far ina bella preda charn.

Tenor ella faschess quai senn sch'il dumber d'animals ch'in chatschader dastga sajettar per di fiss limità. Plinavant sa Theus s'imaginar che quai pudess donnegiar il pool genetic dals tschiervs en questa regiun.

Nagin problem ord vista da la biologia

Flurin Filli, biolog e commember da la direcziun dal Parc Naziunal Svizzer, di dentant ch’el vesia ord punct da vista da la biologia nagin problem. Sche quels chatschaders hajan sajettà 10 tschiervs aifer curt temp sche lura haja quai segir blers tschiervs en questa regiun e quels n’hajan garantì betg sajetta ils ultims tschiervs en il Puschlav. Plinavant sajan ils tschiervs pli probabel er geneticamain divers.

RR actualitad 12:20