Siglir tar il cuntegn
cuntegn

Chatscha 2017 Chatscha speziala en il Partenz

Perquai che la tuberculosa smanatscha da vegnir importada da l'Austria e pervia dal grond dumber da tschiervs, vegn en il district Partenz-Signuradi manà tras in project da pilot.

Legenda: Guardar il video Chatscha speziala en il Partenz pervia da privel da tuberculosa. Durada 03:17 minutas.
Or da Telesguard dals 04.09.2017.

En il Partenz datti quest onn reglas spezialas. Uschia han ils chatschaders pudì sajettar ils emprims trais dis da la chatscha era en novs asils – dentant betg tut ils animals. Els han pudì sajettar animals feminins betg purtants e tschiervs lantschet independentamain da la lunghezza da lur corna. Fin ils 10 da settember vala questa nova regla er ordaifer ils asils dal Partenz e quai senza restricziuns da quantitad. Vinavant pon ils chatschaders a St. Antönien sajettar tut ils tschiervs masculins en ils guauds da protecziun donnegiads. Quai è pussibel durant l'entira chatscha auta.

Differentas opiniuns davart la reglas

Il schef guardiaselvaschina dal Partenz-Signuradi Heinz Guler è da l'opiniun, che quels pass sajan necessaris - ins haja gì da reagir. Era il manader da l'Uffizi da chatscha e pestga Georg Brosi di, che quai saja da far per reducir il privel da la tuberculosa.

I dat dentant era vuschs criticas, che manegian che quella acziun portia nagut. Il tschierv scappia atras quellas reglas sur cunfin e giaja en l'Austria. Georg Brosi respunda a quai, ch'il tschierv saja – tenor experientscha – in animal che restia pli u main en ses territori e na giaja betg tuttenina insanua auter.

RR Telesguard 17:40