La PS pretenda en furma d'in'inizativa dals chantuns che la lescha da chatscha federala vegn revedida e ch'i daventa uschia pli simpel da sajettar lufs. Per cuntanscher quai vul ella reactivar la proposta oriunda dal cussegl federal: Lez aveva proponì da sajettar lufs mo, sch'els chaschunan donns malgrà mesiras da prevenziun, ni sche persunas èn periclitadas. Il parlament aveva lura fatg midadas, uschia che lufs avessan pudì vegnir sajettads gia avant ch'els han chaschunà donns. Perquai ussa il cumpromiss, cun il qual tuts possian viver, di il president da la fraziun da la Partida socialdemocratica (PS) en il Cussegl grond Lukas Horrer.
Igl è da tschertgar ina soluziun raschunaivla e pussibilitar ina coexistenza funcziunanta cun il luf, e betg insister sin posiziuns ideologicas maximalas.
Sper quai duai la cumpetenza finala restar tar la confederaziun e betg ir vi tar ils chantuns. Il cussegl grond tracta l'iniziava dals chantuns en ina da las proximas sessiuns. Sch'i dat in GEA dal cussegl grond, lura va l'iniziativa a Berna. Là duai ella valair sco intimaziun ni sco proposta per puspè prender a mauns la lescha da chatscha.