Siglir tar il cuntegn

Header

video
Bravuogn: Surveglianza da las deponias da rument
Or da Telesguard dals 14.01.2022.
laschar ir
cuntegn

Bravuogn/Trimmis/Zuoz Cameras sin deponias èn adina pli popularas

Bravuogn vul en l'avegnir survegliar sias deponias da rument cun cameras. A Trimmis ed a Zuoz datti gia quai, e las experientschas sajan bunas. L'intent da las cameras è da far frunt a la dismessa illegala, che s'augmenta adina dapli.

Sco quai che Luzi Schutz, il president communal da Bravuogn Filisur ha ditg envers RTR, haja la vischnanca in problem cun dismessa illegala. Savens bittan persunas satgs da rument senza pajar la taxa. Insatgi aveva schizunt ina giada dismess sutgas en in moloc. Perquai vul la vischnanca ussa installar cameras per survegliar sias deponias. Proximamain po la vischnanca da Bravuogn decider, sch’ella vul surveglianza en tscherts lieus.

audio
Camera sin deponia: Exempel Bravuogn/Trimmis
03:17 min, Actualitad dals 18.01.2022.
laschar ir. Durada: 03:17 minutas.

Trimmis è cuntent cun las cameras

La vischnanca Trimmis ha gia nov mais experientscha cun cameras. Sco quai che Cecilia Manetsch, la responsabla en la suprastanza dal departament da dismessa ha ditg, haja la vischnanca gia pudì admonir diversas persunas. Grazia las registraziuns da las cameras eri pussaivel d'incassar las taxas betg pajadas. Multas n’haja la vischnanca enfin oz betg dà. Quai n'è era betg l’intent da la surveglianza.

A Zuoz dapi il 2006 realitad

Il post da dismetter rument dasper la staziun da Zuoz è dapi l’onn 2006 surveglià cun ina camera. Il Cussegl communal aveva decidì questa mesira suenter ch’i era vegnì dismess da tuttas sorts rauba scumandada, sco sutgas u canapés. Dapi lura haja la camera sa verifitgada, di il president communal Andrea Gilli. Quai surtut sco mesira preventiva. Durant ils 16 onns ch’ella pendi hajan ins stuì dar mo ina suletta multa.

audio
Camera sin deponia: Exempel Zuoz
03:01 min, Actualitad dals 18.01.2022.
laschar ir. Durada: 03:01 minutas.

Suenter la montascha haja quai bain dà discussiuns en vischnanca. Dentant mo perquai che la basa legala mancava, e betg pervia da la camera sezza. Dal 2008 è lura vegnì integrà in artitgel davart la surveglianza da video en la lescha communala davart il rument – e dapi lura na saja ella nagin tema pli.

Protectur da datas n'è betg cuntent

Betg cuntent cun la tendenza ch’i dat adina dapli cameras en deponias, è Thomas Casanova, l’incumbensà dal chantun per la protecziun da datas. El è da l’avis che cameras na sajan betg la dretga via da punir persunas che dismettan illegalmain rument. Quai saja sin livel da multas disciplinaras. Per el na saja betg dada la relaziun tranter chastiar cun ina multa e proteger las datas persunalas cunter il maldiever.

Lubidas sajan las cameras bain. Il Cussegl grond ha gia tractà quai avant quatter onns. Il mument ha Casanova conuschientscha da 12 vischnancas che surveglian deponias da rument. El quinta ch’en l’avegnir pudessan quai daventar bler dapli.

RTR actualitad 07:00

Artitgels legids il pli savens

Scrollar a sanestra Scrollar a dretga