Siglir tar il cuntegn

Header

video
Las preparaziuns per il Big Air a Cuira
Or da Telesguard dals 13.10.2021.
laschar ir. Durada: 3 minutas 33 Secundas.
cuntegn

Big Air Festival La schanza da 40 meters è pinada

Sur il di siglian skiunz e snowboardistas d'ina schanza da 40 meters autezza e la saira dattan chantadurs renumads concert – quai empermetta il Big Air Festival. Mo il mument sentan ins anc pauc da quai, ils lavurers e las lavureras èn amez la preparaziun per l'occurrenza.

Sin l'entir areal èn radund 30 lavurers e lavureras vid preparar l'event ha che lieu ils 22 ed ils 23 d'october 2021. 25 kilometers cabels d'electricitad e 650 tonnas fier èn mo duas da las cifras che descrivan il Big Air Festival.

audio
Preparaziuns per il festival da Big Air
ord Actualitad dals 13.10.2021.
laschar ir. Durada: 3 minutas 56 Secundas.

Massa naiv

L'indriz il pli spectacular è segiramain la schanza ch'è 40 meters auta e varga 100 meters lunga. Per ch'ils 160 atlets da 20 naziuns possian far lur trics sin quella, vegni preparà naiv. Massa naiv – numnadamain 100 fin 110 tonnas per di. Quai èn tranter 10 e 15 camiuns plains per di.

Nus essan bain en il temp cun las preparaziuns.
Autur: Sandro Keller manader d'infrastructura

Era la zona da giasts e la tribuna èn las lavureras ed ils lavurers vid bajegiar si. Tut ils indrizs gronds duain esser pinads fin a la fin da quest'emna. A partir da glindesdi vegn alura preparà ils stans per il program ch'ha lieu durant il di: Simulaturs da snowboard, stans da mangiar, tendas da festa ed anc bler auter.

Varga 10'000 tickets

Per musica procuran ils artists renumads che sa presentan sin la tribuna ch'è gist sper la schanza. Apache, Nura e Sido èn trais dals chantadurs il pli enconuschents. Il program musical è segiramain in dals motiv daco ch'igl è vegnì vendì fin ussa varga 10'000 tickets.

RTR actualitad 17:00

Artitgels legids il pli savens