Siglir tar il cuntegn

Header

cuntegn

Analisa regenza Fidanza en PPS manca

Il Grischun na vul simplamain betg la Partida populara svizra en la regenza grischuna. I para sco sch'il suveran na fida betg che la PPS saja abla da far ina politica da consens.

Igl è gia la quarta giada che la PPS fa naufragi cun vulair gudagnar in sez en la regenza grischuna: Duas giadas è questa emprova ida da la glatscha giu cun Heinz Brand, avant quatter onns cun Walter Schlegel e quest onn cun Roman Hug. Trais differents candidats cun differents satgados – e tuttina na gartegia quai betg.

La PPS ha fatg las ultimas elecziuns naziunalas dal 2019 30% da las vuschs ed oz vegn ella a gudagnar sezs en il Cussegl grond. E malgrà questa forza da vuschs na vegn ella betg da recaltgar il sez desiderà en la regenza. Tenor il suveran èsi pia en urden sche la PPS è represchentada en il parlament – surpigliar responsabladad en l'executiva – gliez duain dentant auters far. Igl è oz surtut ina terrada per la partida e betg mo per il candidat Roman Hug. La partida vegn a stuair analisar da fund ensi il resultat dad oz.

Tge ulteriuras conclusiuns porta questa dumengia?

Il Grischun sa tegna gugent vid quai ch'el ha, vi da l'enconuschent e na fa betg gronds experiments. Plinavant n'èsi para nagin problem che l'Allianza dal Center ha ina maioritad en la regenza.

Ina surpraisa è il resultat da Martin Bühler. Quai mussa che votantas e votants han fidanza en il «mister corona» e ch'el ha giugà ina rolla centrala durant la crisa da corona. Oz ha el survegnì la pajaglia persuenter. Plinavant correspunda Martin Bühler al tip da politicher ch'il Grischun ha gugent: Lavurus, dentant in modest che na fa betg grondas caneras.

Nagina surpraisa è la conferma da Jon Domenic Parolini che fa in resultat respectabel. Er per el vala: Il Grischun remunerescha e reelegia persunas en uffizi. Gist las ultimas emnas ha el survegnì ferm sustegn da la scena da cultura e probablamain ha er il fatg ch'el è stà il sulet candidat dal Grischun dal sid giugà ina rolla impurtanta.

La strategia da l'Allianza dal Center dad anc nominar Carmelia Maissen ha purtà fritg. Uschia ha il Grischun puspè ina dunna en la regenza – surstar fa sulet il fatg ch'ella è pir la terza dunna en questa funcziun.

Er sche Peter Peyer vegn confermà cleramain en uffizi, avess ins dastgà spetgar ch'el fetschia dapli vuschs sco minister da sanadad ch'è stà bler en la publicitad. Gartegià è gliez a Marcus Caduff che resta en uffizi cun il meglier resultat.

Valentin Schmed

Valentin Schmed

Manader programmaziun RTR

Avrir la boxa da profil Serrar la boxa da profil

Valentin Schmed è vice-schefredactur da RTR e persequitescha dapi onns l'actualitad regiunala, chantunala e naziunala. Sco manader programmaziun è el responsabel per metter accents a media vista en il program da radio, televisiun ed online tar RTR.

RTR actualitad 15:00

Artitgels legids il pli savens