Il «derschalet» – in nausch siemi che bitta ins ord letg – è il Pled Rumantsch 2018. Cun 42% da las vuschs ha el pudì persvader il pli fitg il public da RTR. Sin il segund plaz suonda cun 27% il «chüsatoff», ina versiun rumantscha per il «whistleblower».
Durant in'emna han Rumantschas e Rumantschs pudì decider via in online-voting sin la pagina d'internet RTR, tgenin dals tschintg pleds selecziunads da la giuria ch'è per els il Pled Rumantsch 2018. Gia baud è il «derschalet» sa cristallisà sco pled preferì.
«... cura ch'i avevan bavì sco foras ...»
Il pled «derschalet» è atgnamain in pled oriund sursilvan. Ma tar quels e quellas che noss correspundents han dumandà sin via a Mustér na para el betg dad esser fitg derasà. Ina u l'auter aveva in'idea en tge direcziun ch'i pudess ir ed ina dunna enconuscha il «derschalet» cun tut autras muntadas sco p. ex. avair problems cun la gnerva u er baiver da memia:
Principalmain ils umens avevan in derschalet cura ch'i avevan bavì sco foras e na savevan betg tge ch'els faschevan.
Tar la dumonda sch'il pled da l'onn plascha u betg van las opiniuns ina ord l'autra a Mustér. Ils ins èn da l'avis ch'i saja in bel pled e bun ch'el vegnia puspè clamà en memoria, ad auters na plascha el insumma betg.
114 propostas en 3 emnas
Trais emnas ha il public pudì inoltrar propostas per il pled a RTR. Da las total 114 propostas ha lura ina giuria definì tschintg pleds davart ils quals il public ha pudì decider. En la giuria èn stads da la partida Anna-Alice Dazzi, linguista tar RTR, Gion Nutegn Stgier, redactur ANR e Viola Pfeiffer, romanista ed autura. La giuria aveva er resguardar che radund ¾ da las propostas inoltradas n'han gì nagin connex cun l'onn 2018. Perquai ha ella elegì ils dus pleds «derschalet» e «lindornar».
Il pled «derschalet» ha inoltrà Mattias Arpagaus da Laax e suonda sin «flutgets» ch'è stà il pled da l'onn 2017.
RR actualitad 12:00
