Siglir tar il cuntegn

Header

Navigaziun

foto da Justina Simeon Cathomas.
Legenda: Justina Simeon Cathomas, la manadra da la Cussegliaziun professiunala dal chantun Grischun. RTR, Ivo Orlik
cuntegn

Fiutscher «Fiutscher» porta fritgs: Boom tar cussegliaders da clamada

Suenter l’exposiziun da professiuns ha la cussegliaziun da professiun da far tut a dubel.

Vesair cun agens egls 400 professiuns en in unic lieu – quai è mo pussaivel durant ils tschintg dis da l’exposiziun da professiuns «Fiutscher» a Cuira. 13’000 visitaders han nizzegià quella spierta e tar bain inqual ha ella gì in effect persistent: Dapi l’exposiziun han ils 15 cussegliaders da professiun en il Grischun uss da far tut a dubel.

Actualmain blers termins cun scolars e giuvenils

Els hajan fitg bleras dumondas, di la manadra da la cussegliaziun da clamada, Justina Simeon Cathomas. I dettia er scolaras u scolars ch'avevan gia decidì dad ir vinavant en scola e sajan uss vegnids tar la cussegliaziun per sa laschar cussegliar anc ina giada.

Dapli plazzas che giarsuns en Grischun

Professiuns da lavurs manualas, en la gastronomia u en il segment creativ na sajan betg pli uschè attractivas sco pli baud, manegia Justina Simeon-Cathomas. Cunzunt tar buns scolars saja il squitsch da far scolas e studis actualmain pli preschent.

La cussegliaziun rendia perquai adina puspè attent a la pussaivladad da far in emprendissadi e prender suenter per mauns ina matura professiunala. Quai saja er ina buna e cuntentaivla varianta per far carriera.