Creschida si è la chantadura sper la mar, pli tard ha ella abità blers onns en la chapitala dal Peru, a Lima. Là lavurava Patty Lardi sco decoratura d'interiurs e chantava en ina gruppa da folclora. Uschia ha ella era emprendì d’enconuscher ses um – in Puschlavin. Lez aveva la lavur manà a Lima.
La finala èn Patty e ses um sa decidids da vegnir en il Grischun. Qua plaschi bain ad ella, la fradaglia d’enviern dentant adina main. Uschia van els mintg’enviern per pliras emnas a Lima.
Patty Lardi è entant disada cun las mentalitads differentas. Ina chaussa ch’ella na chapeschia dentant era suenter 35 onns betg sajan sgnoccas. Quellas na chapeschia ella simplamain betg, e quai vilentia magari ella.
En ses mintgadi è la musica enorm impurtanta per Patty Lardi. Gia a Lima tutgava quella tar ses mintgadi. E musica fa ella anc adina.
