Siglir tar il cuntegn

Acziun da stad Sin la senda da stgilats ad Arosa

Stgilats èn animalets charins, ma savens era schenads. Ad Arosa datti ina via da stgilats ch’empermetta ch’ils stgilats mangian las nuschs or da maun. A chaschun da l’acziun da stad mirain nus, sche quai è propi uschia.

Legende: Video Via da stgilats Arosa abspielen. Laufzeit 00:20 Minuten.
Or da Actualitad video dals 10.07.2017.

Il Grischun n’ha nagins zoos sco Turitg u Basilea. Dentant na ston ins gnanc ir uschè lunsch per vesair animals. Sch’ins ha cletg e pazienza ves’ins era animals selvadis en noss guauds. Ils animals èn dentant schenads. Ad Arosa duess quai esser auter. Betg mo ils stgilats mangian nuschs or dals mauns, mabain era utschels. Angela Hendry mira per nus, sch’ils animalets èn propi uschè confidents.

Purtret da la reportra Angela cun ils uregliers dal Skoopy.
Legenda: La reportra Angela Hendry rapporta direct da la senda da stgilats ad Arosa. RTR, Angela Hendry

Chattar la via

Per evitar las storschas viagiain nus cun il tren. Davent da la staziun dad Arosa èsi stà simpel da chattar la senda. La via è signalisada bain ed è da cuntanscher en paucas minutas a pe.

Ils stgilats n'han naginas retegnientschas

Ils stgilats d’Arosa èn domestics e vegnan propi vi e maglian las nuschettas direct or dal maun. Ils curaschus raivan schizunt da las chautschas siadora. Ideal per observar in’entira massa stgilats che van da las plantas ensi ed engiu. I dat stgilats brin cotschens, cun ni senza alv, lura era stgilats stgir brins, in pau da tut las sorts.

Pavlar è nagin problem

Sch’ins spassegia e dat da magliar ad els pudess ins pensar ch’ils stgilats maglian en in di ch’i ha massa visitaders bler da memia. Quai n’è dentant betg il cas. Ils stgilats maglian simplamain uschè bler sco els pon e suenter zuppan els las nuschs. Sper ils stgilats pon ins era anc observar auters animalets. Er utschels pon ins pavlar. Quels n’èn dentant betg uschè domestics sco ils stgilats. Ina spassegiada sin la via da stgilats ad Arosa è ideal per tut quels ch'han gugent stgilats, la natira ed il guaud. La spassegiada fa buna luna.

RR actualitad 11:00