Siglir tar il cuntegn

Header

cuntegn

Expediziun Grischun Las istorgias da Zorten

En il museum local da Vaz a Zorten stat in mulin ch'è anc adina en funcziun. Quai grazia a la pazienza da Walter Brunenr

Zorten e conturn era ina regiun cun massa spias da graun. Perquai devi er in mulin en bunamain tuttas vischnancas. Uschia era a Zorten. Il mulin è stà en funcziun circa dal 1860 enfin il 1950. Pli tard n’è quel betg pli vegnì duvrà enfin ch’ins ha spazzà la chasa cun il mulin a Zorten. Ils indigens han dentant vulì mantegnair lur mulin. Walter Brunner che lavurava tar la vischnanca ed era scrinari, ha survegnì l’incumbensa da bajegiar si il mulin. Dapi 29 onns è quel uss puspè en funcziun. En il museum local da Vaz pon ins guardar ed er mular graun cun quel.

Il lieu dal museum è ina sfida

Malgrà il mulin ed ils ulteriurs passa 6’000 objects ch’il museum local da Vaz posseda, saja quai ina sfida da mantegnair il museum, di Marlies Eugster, la presidenta da l’uniun dal museum.

audio
Bunura: Il mulin vegl da Zorten è anc adina en funcziun
ord Actualitad dals 13.07.2018.
laschar ir. Durada: 2 minutas 7 Secundas.

Senza sustegn finanzial da la vischnanca burgaisa e da la vischnanca politica da Vaz na fiss quai betg pussaivel. Er il lieu na saja betg ideal. A Zorten dettia paucs turists. «Sch’il museum fiss a Lai, dessi segir dapli fluctuaziun.», uschia Marlies Eugster. Ma tuttina è ella persvadida ch’il museum saja al dretg lieu. Perquai che la chasa, nua ch’els exponan, era pli baud in ospizi da paders e suenter la chasa pravenda. Il museum local tutgia simplamain là.

Ils da Zorten – cartents fidaivels

Ils da Zorten sajan fidaivels cartents, quai di il plevon Sur Clau Martin Bieler. El è dapi tschintg onns en il cumin baselgia da Vaz – che cumpiglia las duas plaivs da Lai e Zorten. Cunquai ch’intgins giuvens s’engaschian en il vitg per la plaiv, na saja quai betg mo la generaziun veglia che giaja en baselgia. Er uffants e scolars chattian pli savens la via en baselgia ch'era schon.

Uschia aveva l’entira vischnanca da Vaz be otg ministrants cura ch’el è daventa qua plevon. Uss hajan els 60 ministrantas e ministrants. Cun quels fa il plevon oriund da Rabius era in viadi da ministrants e dat ductrina.

audio
Bunura: Ils da Zorten èn fidaivels cartents
ord Actualitad dals 13.07.2018.
laschar ir. Durada: 2 minutas 7 Secundas.

Il furn vegl da Zorten vegn anc duvrà oz per far paun

La pura da Lain Irene Parpan fa regularmain paun en il furn tradiziunal ch'è en il vitg da Zorten. Quest paun venda ella a butias e hotels da la regiun. Dentant er gruppas e classas pon vegnir a far paun a moda e maniera tradiziunala. Emprendì da far paun en il furn ha ella dad Erna Schneider. Lezza è naschida e creschida si a Zorten ed ha gia emprendì da matta co far paun. Uss dat ella vinavant la savida a tuts ch'han interess d'emprender quai. Plinavant è Erna Schneider en la suprastanza da la societad che mantegn il furn.

audio
Mezdi: Far paun a la veglia a Zorten
ord Actualitad dals 10.07.2018.
laschar ir. Durada: 3 minutas 29 Secundas.

Pli baud in furn per l'entir vitg

Dal vitg saja strusch anc insatgi che giaja a far paun el furn da Zorten, di Erna Schneider. Il stgaudar en, avair la dretga temperatura, far la pasta e tut saja ina gronda lavur. Pli baud gievan las dunnas dal vitg schon anc a far paun en il furn da Zorten. Ma lura eran las famiglias er pli grondas cun 6 fin 7 uffants. Uschia che las mammas faschevan gist paun per duas emnas u in'entir mais.

RR actualitad 12:00+

Artitgels legids il pli savens