Siglir tar il cuntegn

Header

cuntegn

Expediziun Grischun Las istorgias da Putz

Putz n'ha nagina scola, nagina stizun, nagina posta ed er naginas ustarias. Ma il vitget d'80 abitants ha a l'entrada ina ruina dal 13avel tschientaner. E tradiziun tar intgins pensiunads dad «Unterputz» ha l'emplenir ora ensemen las cifras da lotto.

Il mardi vegn emplenì or ensemen las cifras da lotto ad «Unterputz»

Intgins abitants da «Unterputz» han ina tradiziun in zic speziala. Mintga mardi da mesa las dudesch sa scuntran intgins dals abitants per emplenir ora ensemen las cifras per dar «Euromillions». Il schef ed organisatur da l'entira chaussa è l'um da 79 onns, Paul Nebel. El fa statistica e documentescha tut las scuntradas. Fin oz n'haja dentant nagin da Putz tratg la gronda summa, raquinta el.

La speranza che insatgi da nus gudogna in di en il lotto mora sco davos.
Autur: Paul Nebel abitant da Putz

En il center na stat dentant betg il giugar lotto. I giaja oravant tut per la cumpagnia, raquintan las persunas preschentas. Il bler sajan els tranter 4 e 7 persunas. Els baivian in ensemen e discurrian in zic davart quai che curra e passa.

audio
Mezdi: Ad Unterputz vegn giugà ensemen Euromillions
ord Actualitad dals 15.08.2018.
laschar ir. Durada: 3 minutas 57 Secundas.

La ruina Castels – il star dal vitg

Cunquai ch'i na dat a Putz nagina stizun e dapi intgins onns era nagina ustaria, saja la ruina Castels vegnida in zic il lieu da sentupada per ils abitants da Putz, raquinta Ueli Thöny. El è scolast pensiunà ed abità gia dapi il 1980 en il vitget en Partenz. E la ruina enconuscha strusch insatgi uschè bain sco el. El discurra gugent da l'istorgia dal star dal vitg.

audio
Mezdi: La ruina – Il star dal vitg en il Partenz
ord Actualitad dals 14.08.2018.
laschar ir. Durada: 3 minutas 27 Secundas.
La ruina Castels è schon in zic noss lieu da scuntrada a Putz.
Autur: Ueli Thöny abitant da Putz

Ueli Thöny è dentant era losch che la ruina vegn anc oz magari duvrada per eveniments. Per concerts, per teaters e da glindesdi da Pasca èsi tradiziun ch'il «Eierputscha» ha lieu. In gieu nua ch'i vegn guardà tgi che ha il pli ferm ov da Pasca.

RR actualitad 12:00

Artitgels legids il pli savens