Mantogna sin ina terrassa da sulegl. Ins auda a tschivlar ils utschels, qua e là passa tras in tractor. La suletta pussaivladad per cumprar en è la pitschna butia dal vitg. E dentant: 30% dals abitants èn sut 20 onns. Quai surtut pervi da l'OECO Energie Zone.
Fontauna Gemella - il lieu d'inscunter
Bunamain mintga damaun suenter las otg avra la butia dal vitg. La butia è dentant betg mo la butia, ma il lieu d'inscunter a Flerden. Vi da las trais maisas en la butia sesan mintga di lavurants, pensiunads ed era giasts. In bun lieu per discutar, tge tgi gira en il vitg.
La butia datti dapi bunamain 13 onns. Da quel temp ha il Volg serrà sias portas. Per betg stuair ir en la val per cumprar en, han las dunnas dal vitg simplamain avert sezzas ina butia - cun grond success.
30% giuvens – grazia a chasas ecologicas
Avant 15 onns han ils da Flerden percurschì, ch'igl ha en scola adina pli paucs uffants. La scola vulevan els dentant exnum tegnair en il vitg. Uschia ch'els han stuì attrair novas famiglias. Perquai han els lantschà il project «OECO Energie Zone». En quella eran ils pretschs per il terrain fitg bass, mo 80 francs per meter quadrat. Vinavant stuevan ils patruns da construcziun fabritgar tenor il standard da minergia. Ozendi n'è quai nagut da spezial, avant 15 onns era quai dentant in'argument essenzial. L'effect: oz han els perfin in magister dapli en scola.
Impressiuns da Flerden
Flerden sa chatta in quart d'ura viadi cun il bus sur Tusaun. La via principala passa a l'ur dal vitg vi e va lura en direcziun Glaspass. A Flerden stattan circa 220 abitants, blers dad els èn purs. Dentant abitan qua er in pèr famiglias giuvnas. In punct marcant dal vitg na datti dentant betg. Il highlight è la vista sur la Val Tumleastga.
Or da l'archiv:
RR actualitad 12:00