Siglir tar il cuntegn
cuntegn

Abitaziuns secundaras L’istorgia da l’iniziativa d’abitaziuns secundaras

L’iniziativa «fin a la construcziun excessiva d’abitaziuns secundaras» pretenda da las vischnancas da restrenscher la construcziun d’abitaziuns secundaras sin 20 pertschient. Questa limitaziun ha consequenzas per blers lieus turistics dal Grischun ch’han gia surpassà questa quota.

Duas chasas da vacanzas cun lamellas serradas.
Legenda: Abitaziuns da vacanzas. Keystone

La limitaziun d’abitaziuns secundaras e ses effect

Chasa cun abitaziuns secundaras a Laax.
Legenda: Ils da Laax han vuschà per restricziuns e taxas directivas per segundas abitaziuns. Keystone

Tenor il Departament federal per ambient, traffic, energia e communicaziun datti radund 500’000 abitaziuns secundaras en Svizra. L’iniziativa «fin a la construcziun excessiva d’abitaziuns secundaras» pretenda da las vischnancas da restrenscher la construcziun d’abitaziuns secundaras sin 20 pertschient. Tar radund in quart da las vischnancas è questa quota gia surpassada. Quai cunzunt tar vischnancas en las Alps ed en il Tessin. Questa limitaziun ha consequenzas per blers lieus turistics dal Grischun ch’han gia surpassà questa quota.

Ils adversaris èn da l’opiniun...

  • che la quota da 20 pertschient impedeschia da resguardar ils circumstanzas localas.
  • ch’en differentas vischnancas turisticas pudess quai muntar in stop da bajegiar perquai che la quota è gia cuntanschida.
  • che la lescha da planisaziun da territori saja vegnida revedida e cuntegnia gia mesiras per regular las segundas abitaziuns.

Ils aderents èn da l’opiniun...

  • che la construcziun nunlimitada d’abitaziuns secundaras devasteschian la cuntrada.
  • che la gronda dumonda d’abitaziuns secundaras procurescha ch’ils pretschs per immobiglias creschia ed ils indigens na chattian betg pli abitadis favuraivels.
  • ch’ils lieus da vacanzas sajan dependents d’ina bella cuntrada. Memia bleras abitaziuns secundaras mettian en privel quella e pericliteschian in turissem persistent.

Cumenzà hai cun l’inoltraziun da l’iniziativa

Chasas da vacanzas cun lamellas serradas.
Legenda: Abitaziuns da vacanzas. Keystone

L’iniziativa «fin a la construcziun excessiva d’abitaziuns secundaras» è vegnida inoltrada la fin 2007 cun var 110’000 suttascripziuns da l’uniun Helvetia Nostra, ina uniun affiliada a la fundaziun Franz Weber. L’iniziativa è vegnida inoltrada ensemen cun l’iniziativa «fin cun la construcziun d’edifizis ch’engrevgeschan l’ambient e la cuntrada». Quella è dentant vegnida retratga l’october 2009..

Revisiun parziala da la lescha per la planisaziun dal territori

Durant il 2009 e 2010 tracta il cussegl federal ed il parlament la revisiun parziala da la lescha da planisaziun dal territori. Quai sco cunterproposta indirecta a l’iniziativa cunter la construcziun excessiva d’abitaziuns secundaras. Damai ch’il cussegl naziunal ed il cussegl dals chantuns n’èn betg sa cunvegnids da concretisar la limitaziun en d’abitaziuns secundaras en la revisiun da la lescha n’è l’iniziativa betg vegnida retratga.