2 x Nadal a Vella

Pastas, dultscharias, cuppas da conservas, risplis, palpiri... La «Ustria dalla Posta» è stada en il center da l'acziun 2 x Nadal dals 07.01.2016.

Abitants e giasts da Vella èn vegnids en rotschas cun tastgas plainas e pachets en tuttas furmas. La moderatura Marionna Lombriser ha pudì prender encunter ina pluna pachets per l'acziun. Total èsi vegnì ensemen 281 kg rauba. Il suentermezdi èn uschia 26 pachets ids sin posta.

Marionna Lombriser ha er gì la chaschun da discurrer cun plirs visitaders e cun ils manaders da la «Ustria dalla Posta» a Vella. L'ustier Gian Ragettli-Capeder è cuntent cun il manaschi en la pli veglia ustaria da Vella.

Suenter las nov èn set scolars da Pierina Cabalzar arrivads en l'ustaria. Els avevan gist scola da cuschinar ed han purtà punsch, ris, levon, zutger da vaniglia, farina e pulvra da zutger. Tut rauba ch'era restada enavos da lur festa da Nadal.

Maria Alig e Julia Caminada èn duas audituras dal RR che han gì cletg. Dunna Alig aveva gudagnà in pachet d'Advent en il radio e dunna Caminada aveva pudì regalar la cuppina dal RR. Sco engraziament han ellas decidì da purtar insatge per l'acziun 2x Nadal.

Placi Degonda da la Crusch Cotschna Grischuna ha declerà tge products che vegnan rimnads e nua ch'els sa tschentan.